بھارتی اسٹریمنگ چینل زی فائیو پر ریلیز ہونے والی پاکستانی ویب سیریز 'ایک جھوٹی لو اسٹوری' کو اب امریکا میں موجود شائقین کے لیے بھی ریلیز کردیا گیا۔

ویب سیریز ’ایک جھوٹی لو اسٹوری‘ کو زی فائیو ہی کی یو ایس اے سروس پر ریلیز کیا گیا ہے۔

خیال رہے کہ ’ایک جھوٹی لو اسٹوری‘ کو بھارتی اسٹریمنگ ویب سائٹ زی فائیو کے زندگی چینل پر گزشتہ برس 30 اکتوبر کو ریلیز کیا گیا تھا۔

مزید پڑھیں: سچا پیار تلاش کرنے پر مبنی ’ایک جھوٹی لو اسٹوری‘

اب اس سیریز کی ڈائریکٹر مہرین جبار نے اعلان کیا کہ یہ ویب سیریز امریکا میں موجود افراد کے لیے بھی دستیاب ہے۔

اس ویب سیریز کی کہانی متوسط گھرانے کے افراد کے گرد گھومتی ہے جو سماجی دباؤ کے تحت سوشل میڈیا کا استعمال کرکے سچا پیار تلاش کرنے سمیت خود سے امیر لوگوں کو ڈھونڈنے کی کوشش کرتے ہیں۔

یہ بھی پڑھیں: سوشل میڈیا پر سچا پیار ڈھونڈنے والوں کی ’ایک جھوٹی لو اسٹوری‘

ویب سیریز میں پاکستانی سماج میں شادی، محبت، متوسط اور امیر طبقوں میں پائی جانے والی تفریق اور چھوٹے گھرانوں کی لڑکیوں اور لڑکوں کی جانب سے خود سے بڑے اور دولت مند گھرانوں کے جنس مخالف کے افراد سے محبت کرنے کے معاملے کو انتہائی احسن انداز میں دکھایا گیا ہے۔

’ایک جھوٹی لو اسٹوری‘ کی مرکزی کاسٹ میں بلال عباس خان اور مدیحہ امام شامل ہیں جب کہ سیریز میں حنا بیت، محمد احمد، بیو رانا ظفر، فرقان صدیقی، مریم سلیم، کنزہ رزاق اور کرن حق شامل ہیں۔

اس کی کہانی معروف لکھاری عمیرہ احمد نے لکھی ہے جو اس سے قبل زندگی گلزار ہے سمیت کئی مقبول ڈرامے لکھ چکی ہیں۔