پاکستان کرکٹ ٹیم کے دورہ نیدرلینڈز کا شیڈول جاری

21 اپريل 2022
پاکستانی ٹیم اگست میں نیدرلینڈز جائے گی—فوٹو: اے ایف پی
پاکستانی ٹیم اگست میں نیدرلینڈز جائے گی—فوٹو: اے ایف پی

پاکستان کرکٹ بورڈ (پی سی بی) نے قومی ٹیم کے دورہ نیدرلینڈز کا شیڈول جاری کردیا جہاں اگست میں تین میچوں کی ایک روزہ سیریز کھیلی جائے گی۔

پی سی بی کے اعلامیے کے مطابق سیریز میں شامل تینوں ون ڈے میچز روٹرڈم میں 16، 18 اور 21 اگست کو کھیلے جائیں گے۔

خیال رہے کہ آئی سی سی مینز کرکٹ ورلڈ کپ سپر لیگ میں شامل یہ سیریز جولائی 2020 میں شیڈول تھی تاہم کورونا وائرس کے باعث ملتوی کردی گئی تھی۔

مزیدپڑھیں: کورونا وائرس کے سبب قومی کرکٹ ٹیم کا دورہ نیدرلینڈز ملتوی

پی سی بی نے یہ اعلان ڈچ حکومت کی جانب سے کورونا وائرس کی وبا کے پیش نظر یکم ستمبر 2020 تک تمام اسپورٹس اور ثقافتی ایونٹس پر پابندی عائد کرنے کے بعد کیا تھا.

پاکستان اور نیدرلینڈز کی ٹیمیں اس سے قبل ون ڈے کرکٹ میں آخری مرتبہ کرکٹ ورلڈ کپ 2003 میں مدمقابل آئی تھیں جہاں پاکستان نے کرکٹ کی غیرمعروف ٹیم کو 97 رنز سے شکست دے دی تھی۔

آئی سی سی مینز ورلڈ کپ سپر لیگ میں پاکستان نے اب تک کھیلے گئے اپنے 12 میں سے 6 میچ جیت رکھے ہیں جبکہ نیدرلینڈز کی ٹیم 10 میں سے صرف 2 میچ ہی جیت سکی ہے۔

پی سی بی کے ڈائریکٹر انٹرنیشنل ذاکر خان نے اس حوالے سے کہا کہ انہیں خوشی ہے کہ میزبان بورڈ کے تعاون سے وہ اس سیریز کو ری شیڈول کرنے میں کامیاب رہے ہیں۔

ان کا کہنا تھا کہ یہ سیریز نیدرلینڈز میں کرکٹ کے فروغ اور ترقی کے لیے بہت اہم ہے۔

انہوں نے کہا کہ قومی کرکٹ ٹیم کا سیزن 22-2021 شان دار رہا ہے، وہ پر اعتماد ہیں کہ قومی ٹیم کے کھلاڑی بہترین کارکردگی کا تسلسل برقرار رکھتے ہوئے نیدرلینڈز کے شائقین کرکٹ کو بہترین تفریح فراہم کریں گے۔

شیڈول:

16 اگست: پہلا ون ڈے انٹرنیشنل میچ، وی او سی کرکٹ گراؤنڈ روٹرڈم

18 اگست: دوسرا ون ڈے انٹرنیشنل میچ، وی او سی کرکٹ گراؤنڈ روٹرڈم

21 اگست: تیسرا ون ڈے انٹرنیشنل میچ، وی او سی کرکٹ گراؤنڈ روٹرڈم

ضرور پڑھیں

تبصرے (0) بند ہیں