نیدرلینڈز کی جنوبی افریقہ کو اپ سیٹ شکست، پاکستان کی سیمی فائنل میں رسائی آسان ہوگئی
آئی سی سی ٹی 20 ورلڈ کپ کے اہم میچ میں نیدرلینڈز نے جنوبی افریقہ کو اپ سیٹ شکست دے کر میگا ایونٹ سے باہر کردیا جس کے بعد پاکستان کے سیمی فائنل میں براہ راست پہنچنے کی راہ ہموار ہوگئی۔
ایڈیلیڈ میں کھیلے گئے میچ میں جنوبی افریقہ کی ٹیم نیدرلینڈ کی جانب سے دیے گئے 159 رنز کے ہدف کے تعاقب میں 145 رنز بنا سکی اور اسے 13 رنز سے شکست ہوئی۔
جنوبی افریقہ کی جانب سے رائلی روسو 25 اور ہینڈرک کلاسن 21 رنز بنا کر آؤٹ ہوئے۔
جنوبی افریقہ نے ٹاس جیت کر نیڈر لینڈز کو بیٹنگ کی دعوت دی تھی۔
نیدرلینڈز نے پہلے بیٹنگ کرتے ہوئے مقررہ 20 اوورز میں 4 وکٹوں کے نقصان پر 158 رنز اسکور کیے۔ اسٹیفن مائیبرگ نے 37، ٹام کوپر نے 35 اور میکس او ڈاؤڈ نے 29 رنز کی اننگز کھیلیں۔
جنوبی افریقہ کی جانب سے کیشو مہاراج نے 2، ایڈن مرکرم اور اینریچ نورتیا نے ایک، ایک وکٹ حاصل کی۔
26 گیندوں پر 41 رنز کی شاندار اننگز کھیل کر ناٹ آؤٹ رہنے والے کولن ایکرمین کو پلیئر آف دی میچ قرار دیا گیا۔
لائیو ٹی وی