ترکیہ اور شام میں گزشتہ روز آنے والے تباہ کن سلسلہ وار زلزلوں سے زمین بوس ہوجانے والی عمارتوں کے ملبے تلے دبے افراد کو نکالنے کا عمل شدید سرد موسم کے باوجود جاری ہے جبکہ ہلاکتوں کی تعداد 7 ہزار سے تجاوز کر چکی ہے۔

خبرایجنسی اے ایف پی کی رپورٹ کے مطابق ترقی اور شام میں آنے والے زلزلے کے نتیجے میں ہلاکتوں کی تعداد برھ کر 7 ہزار 146 ہوگئی ہے جبکہ امدادی کارکن ملبے تلے افراد کی تلاش جاری رکھے ہوئے ہیں۔

رپورٹ کے مطابق حکام نے بتایا کہ ترکی میں اب تک زلزلے سے ہلاکتوں کی مجموعی تعداد 5 ہزار 434 اور شام میں ایک ہزار 712 ہوچکی ہے۔

اس سے قبل خبررساں ادارے رائٹرز کی رپورٹ کے مطابق ترکیہ کی ڈیزاسٹر میجنمنٹ اینڈ ایمرجنسی مینجمنٹ اتھارٹی (اے ایف اے ڈی) نے بتایا تھا کہ اموات کی تعداد 4 ہزار 544ہوگئی ہے۔

اتھارٹی کا کہنا تھا کہ زلزلے کے بعد اب تک 285 آفٹر شاکس آچکے ہیں، جس کے نتیجے میں 5 ہزار 775 عمارتیں تباہ ہوئی جبکہ زخمیوں کی تعداد 285 ہے۔

ترکی کی ڈیزاسٹر مینجمنٹ ایجنسی نے کہا کہ 13 ہزار سرچ اینڈ ریسکیو اہکار تعینات کیے گئے ہیں اور متاثرہ علاقوں میں 41 ہزار خیمے، ایک ہزار بستر اور 3 لاکھ کمبل روانہ کیے جاچکے ہیں۔

ترک صدر رجب طیب اردوان نے جنوبی ترکی میں بدترین زلزلے سے متاثرین ہونے والے 10 صوبوں کے مذکورہ علاقوں میں 3 ماہ کے لیے ہنگامی صورت حال نافذ کردی ہے۔

انہوں نے کہا کہ 70 ممالک نے تلاش اور امدادی کارروائیوں میں مدد کی پیش کش کی ہے اور ترکیہ نے سیاحتی مرکز انتالیہ میں زلزلے سے متاثرہ افراد کے لیے عارضی طور پر ہوٹلز کھولنے کا منصوبہ بنایا ہے۔

ان کا کہنا تھا کہ ترکیہ میں زلزلے سے ہلاکتوں کی تعداد 3 ہزار 549 ہوچکی ہے۔

شامی سرحد کے قریب ترک شہر انتاکیہ میں 10 منزلہ عمارت سڑک پر آگری ہے جہاں درجنوں افراد ملبےتلے دبے ہوئے تاہم امدادی کام جاری ہے۔

اس سے قبل ترکیہ میں سال1999 میں مہلک ترین زلزلہ آیا تھا جس میں 17 ہزار افراد ہلاک ہوگئے تھے۔

شام کی حکومت اور ریسکیو سروس کے مطاق گیارہ سال سے جاری جنگ سے متاثرہ ملک میں اب تک 1500 ہلاکتیں رپورٹ ہوچکی ہیں۔

جنوب مشرقی ترکیہ میں قہر مان مرعش کے شہر میں عینی شاہد زلزلے سے ہونے والی تباہی کو الفاظ میں بیان کرنے سے قاصر ہیں۔

23 سالہ صحافی میلیسا سلمان نے کہا کہ ’ہمیں لگا قیامت آگئی، ایسی صورتحال ہم نے پہلی مرتبہ دیکھی ہے۔

پیر کے روز آنے والے زلزلے سے صرف ترکی میں اب تک 16 ہزار سے زائد افراد زخمی ہوچکے ہیں جبکہ ہلاکتوں میں بے تحاشہ اضافے کا خدشہ ہے اور عالمی ادارہ صحت کے اندازے کے مطابق اس بدترین تباہی کے نتیجے میں اموات کی تعداد 20 ہزار ہوسکتی ہے۔

غازی انتیپ، جہاں شام میں ایک دہائی طویل جنگ سے پناہ کے لیے ترکیہ آنے والے ہزاروں افراد قیام پذیر تھے، وہاں ریسکیو ورکرز چیختے اور روتے ہوئے ملبے کو ہٹانے میں مصروف تھے کہ یکایک ایک اور عمارت منہدم ہوگئی۔

ابتدائی زلزلہ اتنا شدید تھا کہ اسے گرین لینڈ جتنا دور محسوس کیا گیا اور اس کے اثر نے عالمی ردعمل کو جنم دیا ہے۔

یوکرین سے لے کر نیوزی لینڈ تک درجنوں ممالک نے امداد بھیجنے کا عزم ظاہر کیا ہے تاہم شدید سرد موسم اور نقطہ انجماد نے کارروائیوں کو سست کردیا ہے۔

انتہائی سرد موسم کے باوجود خوف میں جکڑے رہائشیوں نے رات سڑک پر گزاری اور گرمی کے لیے آگ کے الاؤ روشن کیے۔

ایک رہائشی نے بتایا کہ میرا جاننے والا ایک خاندان ملبے تلے دبا ہوا ہے، صبح 11 بجے تک میری دوست فون کا جواب دے رہی تھی لیکن اس کے بعد سے کوئی رابطہ نہیں ہوا، وہ بھی ملبے کے نیچے ہے۔

ایک 55 سالہ رہائشی نے ’اے ایف پی‘ سے بات کرتے ہوئے کہا کہ ’ہم گھر نہیں جاسکتے، ہر کوئی خوفزدہ ہے‘۔

سب سے زیادہ تباہی غازی انتیپ اور قہر مابین کے درمیان زلزلے کے مرکز پر ہوئیں جہاں پورا شہر ملبے کے ڈھیر میں بدل گیا۔

دوسری جانب شام کے حکام اور ریسیکیو عہدیداروں نے بتایا کہ شام میں ہلاکتوں کی تعداد ایک ہزار 823 ہوچکی ہے۔

سری کاری خبرایجنسی کے مطابق حکومت کے زیر کنٹرول علاقوں حلب، لطاکیہ، حمہ، ادلب اور تارطوس میں 812 افراد ہلاک اور ایک ہزار 449 زخمی ہوگئے ہیں۔

امدادی ٹیموں نے بتایا کہ شامی حکومت کے مخالف گروپس کے زیر قبضہ علاقوں میں ایک ہزار 20 افراد ہلاک اور 2 ہزار 400 زخمی ہوچکے ہیں اور تعداد میں مزید اضافے کا خدشہ ہے۔

قیامت خیز زلزلہ

امریکی جیولوجیکل سروے کے مطابق پیر کو پہلا زلزلہ 20 لاکھ آبادی پر مشتمل قہر مان اور غازی انتیپ شہر کے درمیان مقامی وقت کے مطابق صبح 4 بج کر 17 منٹ پر آیا جس کی گہرائی 18 کلومیٹر تھی۔

حکام نے بتایا کہ 3 بڑے ایئرپورٹس بھی زلزلے کے باعث غیر فعال ہوچکے ہیں جس سے انتہائی اہم امداد پہنچانے میں مشکلات کا سامنا ہے۔

شمالی شام کا زیادہ تر زلزلہ زدہ علاقہ پہلے ہی برسوں کی جنگ اور شامی اور روس کی افواج کی فضائی بمباری سے تباہ ہو چکا تھا جس میں گھر، ہسپتال اور کلینکس شامل ہیں۔

تاہم اقوام متحدہ میں شام کے ایلچی بسام صباغ نے بظاہر سرحدی گزرگاہوں کو دوبارہ کھولنے سے انکار کردیا ہے جس سے باغی گروپوں کے زیر کنٹرول علاقوں تک امداد پہنچ سکے گی۔

شام کی وزارت صحت نے بتایا تھا کہ قدرتی آفت کے باعث حلب، لطاکیہ، حما اور طرطوس کے صوبوں میں نقصان ہوا ہے۔

اس سانحے سے پہلے ہی شام کے جنگ سے پہلے کے تجارتی مرکز حلب میں عمارتیں اکثر خستہ حال انفرااسٹرکچر کی وجہ سے منہدم ہوجاتی ہیں جن کی جنگ کی وجہ سے دیکھ بھال اور مرمت نہیں ہوسکی تھی۔

حکام نے احتیاطی طور پر پورے خطے میں قدرتی گیس اور بجلی کی سپلائی منقطع کر دی ہے اور اسکولوں کو بھی دو ہفتوں کے لیے بند کردیا۔

شمال مغربی شام میں قائم جیل جہاں زیادہ تر داعش کے ارکان قید ہیں، قیدیوں نے زلزلے کے بعد بغاوت کی اور کم از کم 20 فرار ہوگئے۔

امریکا، یورپی یونین اور روس سب نے فوری طور پر تعزیت اور مدد کی پیشکش بھیجی۔