• KHI: Asr 5:20pm Maghrib 7:22pm
  • LHR: Asr 5:02pm Maghrib 7:06pm
  • ISB: Asr 5:10pm Maghrib 7:16pm
  • KHI: Asr 5:20pm Maghrib 7:22pm
  • LHR: Asr 5:02pm Maghrib 7:06pm
  • ISB: Asr 5:10pm Maghrib 7:16pm

پاکستان نیوی کا بحری جہاز امدادی اشیا لے کرشام، ترکیہ پہنچ گیا

شائع March 21, 2023
اسکولوں کے بچوں نے پی این ایس نصر کا دورہ کیا اور افسران اور جوانوں سے بات چیت کی — تصویر: این ڈی ایم اے ٹوئٹر
اسکولوں کے بچوں نے پی این ایس نصر کا دورہ کیا اور افسران اور جوانوں سے بات چیت کی — تصویر: این ڈی ایم اے ٹوئٹر

پاک بحریہ کا بحری جہاز نصر جو کہ بین الاقوامی انسانی امداد اور قدرتی آفات سے متعلق امداد مشن پر تعینات تھا، پیر کو ترکیہ کے بندرگاہی شہر مرسین پہنچ گیا۔

ڈان اخبار کی رپورٹ کے مطابق پی این ایس نصر نے مرسین پہنچنے سے پہلے شام میں امدادی مشن مکمل کیا اور اب زلزلے سے متاثرہ افراد میں تقسیم کرنے کے لیے تقریباً 200 ٹن وزنی امدادی سامان ترک حکام کو فراہم کرے گا۔

ترکیہ اور شام میں گزشتہ ماہ آنے والے شدید زلزلے سے ہزاروں افراد ہلاک ہو گئے تھے۔

امدادی سامان کی دوسری کھیپ 23 مارچ کو پی این ایس معوین پر مرسین پہنچنے والی ہے۔

ترکیہ کی بندرگاہ پہنچنے پر پی این ایس نصر کا استقبال مرسین کے گورنر، حکومتی نمائندوں اور ترکیہ میں پاکستان کے سفیر نے کیا۔

پی این ایس نصر میں جہاز کے اہلکاروں سے ملاقاتوں کے دوران مشن کمانڈر نے چیف آف دی نیول اسٹاف ایڈمرل محمد امجد خان نیازی اور پاکستانی عوام کی جانب سے تعزیت کا اظہار کیا اور ضرورت کے وقت ہر ممکن تعاون کا اعلان کیا۔

اس سے قبل 13 سے 19 مارچ تک شام کی لطاکیہ بندرگاہ پر قیام کے دوران جہاز نے بھاری مقدار میں امدادی سامان اتارا جس میں موسم سرما کے کیمپ، کمبل، گرم کپڑے، راشن، ادویات اور جنریٹرز شامل تھے۔

اس کے ساتھ پاک بحریہ کی طبی ٹیموں نے ایک میڈیکل کیمپ بھی لگایا اور صحت کی خدمات کی فراہمی میں مقامی ڈسپنسری کو مدد فراہم کی۔

اسکولوں کے بچوں نے پی این ایس نصر کا دورہ کیا اور افسران اور جوانوں سے بات چیت کی۔

شامی حکومت اور مقامی لوگوں نے حکومت پاکستان کی جانب سے فراہم کی جانے والی امداد کو سراہا۔

کارٹون

کارٹون : 21 جولائی 2024
کارٹون : 20 جولائی 2024