کراچی: ڈاکوؤں کی فائرنگ سے ایک شہری جاں بحق، 4 زخمی
23 جنوری 2024
کراچی کے علاقے ابوالحسن اصفہانی روڈ پر ڈاکوؤں نے ایک اور شہری کی جان لے لی، جبکہ فائرنگ سے 4 شہریوں کو زخمی بھی کردیا۔
’ڈان نیوز‘ کے مطابق ابوالحسن اصفہانی روڈ پر واقع ملک شاپ پر ڈاکوؤں نے دھاوا بولا اور لوٹ مار کی، اس دوران مزاحمت پر ڈاکوؤں نے اندھا دھند فائرنگ کردی، جس سے عبدالباری نامی شہری جاں بحق جبکہ وسیم، فرحان علی، ایوب اور عطا اللہ زخمی ہوگئے۔
فائرنگ کے بعد ملزمان فرار ہوگئے، واقعے کے سبب علاقے میں خوف و ہراس پھیل گیا اور بھگدڑ مچ گئی۔
واقعے کی اطلاع ملنے پر پولیس موقع پر پہنچی، جاں بحق شہری اور زخمیوں کو ہسپتال منتقل کردیا گیا۔
پولیس نے جائے وقوع سے گولیوں کے خول اکٹھے کیے اور عینی شاہدین کا بیان لیا۔
پولیس کا کہنا ہے کہ گرد و نواح میں لگے سی سی ٹی وی کیمروں کی فوٹیج حاصل کی جا رہی ہے۔
تبصرے (0) بند ہیں