کراچی: سخی حسن میں تیز رفتار واٹر ٹینکر دیوار توڑتا ہوا اپارٹمنٹ میں جا گھسا
کراچی کے علاقے سخی حسن میں تیز رفتار واٹر ٹینکر دیوار توڑتا ہوا اپارٹمنٹ میں جا گھسا۔
ڈان نیوز کے مطابق پولیس کے مطابق حادثے کے نتیجے میں گاڑی مکمل طور پر تباہ ہوگئی، تاہم کوئی جانی نقصان نہیں ہوا، حادثے کے بعد ٹینکر ڈرائیور فرار ہوگیا، پولیس واقعے کی تحقیقات کر رہی ہے۔
واضح رہے کہ گزشتہ ڈیڑھ ماہ سے تواتر کے ساتھ ہیوی ٹریفک کے ذریعے حادثات میں اضافہ دیکھا جا رہا ہے، ان حادثات میں درجنوں افراد جاں بحق ہوچکے ہیں۔
ہیوی ٹریفک کی جانب سے ممنوع اوقات کار میں شہر میں تیز رفتاری کی وجہ سے حادثات کے واقعات پر جماعت اسلامی، ایم کیو ایم پاکستان، مرکزی مسلم لیگ، مہاجر قومی مومنٹ سمیت دیگر سیاسی جماعتوں نے حکومت سے ان واقعات کا سختی سے نوٹس لینے کا مطالبہ کرتے ہوئے سخت اقدامات کرنے کا مطالبہ کیا تھا۔
اس کے بعد سندھ حکومت نے اہم اقدامات کرتے ہوئے ڈمپرز کے کراچی میں داخلے کو رات 10 بجے سے صبح 6 بجے تک محدود کر دیا تھا، یہ اعلان سینئر صوبائی وزیر شرجیل انعام میمن نے پریس کانفرنس میں کیا تھا۔
دوسری جانب کراچی میں ہیوی ٹریفک کے بڑھتے ہوئے حادثات اور شہریوں کی ہلاکتوں کے معاملے پر بیرسٹر حسن خان نے ہیوی ٹریفک کے شہر میں داخلے کے خلاف سندھ ہائی کورٹ سے رجوع کرلیا تھا۔
ڈان نیوز کے مطابق درخواست میں چیف سیکریٹری، آئی جی سندھ، ڈی آئی جی ٹریفک سمیت دیگر کو فریق بنایا گیا تھا، پٹیشن میں کہا گیا تھا کہ رواں ماہ ہیوی ٹریفک سے حادثات میں 74 افراد ہلاک ہوچکے ہیں۔
بیرسٹر حسن خان کی جانب سے سندھ ہائی کورٹ میں دائر کی گئی درخواست میں چیف سیکریٹری، آئی جی سندھ ڈی آئی جی ٹریفک سمیت دیگر کو فریق بناتے ہوئے موقف اختیار کیا گیا تھا کہ روزانہ کی بنیاد پر ڈمپرز لوگوں کو کچل رہے ہیں، شہر میں ڈمپرز، آئل ٹینکرز سمیت ہیوی ٹریفک رش کے اوقات میں چل رہا ہے۔
درخواست گزار نے کہا تھا کہ گزشتہ ایک سال کے اندر 8 ہزار سے زائد شہری ان حادثات میں زخمی ہوئے، رواں ماہ ڈمپرز سمیت ہیوی ٹریفک حادثات سے 74 سے زائد شہریوں کی ہلاکتیں ہوئیں، زیادہ تر ڈرائیورز نشے کے عادی ہوتے ہیں، دن کے اوقات میں شہر کی سڑکوں پر ہیوی ٹریفک پر پابندی عائد کی جائے۔
لائیو ٹی وی