بابراعظم نے ون ڈے کرکٹ میں ویرات کوہلی کا ایک اور ریکارڈ توڑ دیا
قومی ٹیم کے سابق کپتان اور اسٹار بلے باز بابراعظم نے ون ڈے انٹرنیشنل میں ایک اور سنگ میل عبور کرلیا، انہوں نے نیوزی لینڈ کے خلاف فائنل میچ میں ایک روزہ کرکٹ میں میں 6 ہزار رنز مکمل کرلیے۔
کھیلوں کی ویب سائٹ کرک انفو کے مطابق بابراعظم نے کراچی کے نیشنل بینک کرکٹ اسٹیڈیم میں کھیلے گئے سہ فریقی سیریز کے فائنل میچ میں نیوزی لینڈ کے خلاف میچ میں اپنے 6 ہزار رنز مکمل کیے۔
یوں بابراعظم نے بھارتی بلے باز ویرات کوہلی کا ریکارڈ توڑ دیا اور وہ جنوبی افریقہ کے بلے باز ہاشم آملہ کے ہم پلہ آگئے ہیں، دونوں کھلاڑیوں نے 123 اننگز میں 6 ہزار رنز مکمل کیے۔
خیال رہے کہ ون ڈے کرکٹ میں تیز ترین 5 ہزار رنز بنانے کا ریکارڈ بھی بابراعظم کے پاس ہے جو انہوں نے 97 اننگز میں حاصل کیا تھا جب کہ تیز ترین 4 ہزار رنز مکمل کرنے میں بھی وہ ہاشم آملہ کے بعد دوسرے نمبر پر ہیں۔
تاہم، بابراعظم یہ کارنامہ انجام دینے والے تیز ترین ایشین بیٹر ضرور بن گئے ہیں، ویرات کوہلی نے 136 اور کین ولیمسن نے 139 اننگز میں 6 ہزار رنز مکمل کیے تھے۔
اس سے قبل پاکستان کے لیے یہ اعزاز سعید انور کے پاس تھا، جنہوں نے 162 ون ڈے اننگز میں 6 ہزار رنز مکمل کیے تھے۔
وہ ون ڈے فارمیٹ میں 6 ہزار بنانے والے مجموعی طور پر 11ویں پاکستانی کرکٹر بن گئے ہیں، اس فہرست میں سابق کپتان انضمام الحق 11 ہزار 701 رنز کیساتھ ٹاپ پر موجود ہیں، انکے بعد محمد یوسف (9,554) اور سعید انور (8,824) کیساتھ دوسرے تیسرے نمبر پر براجمان ہیں۔
بابر اعظم سے قبل انضمام الحق، محمد یوسف، سعید انور، شاہد آفریدی، شعیب ملک، جاوید میانداد، یونس خان، سلیم ملک، محمد حفیظ اور اعجاز احمد بھی 6 ہزار ون ڈے رنز بنا چکے ہیں۔
واضح رہے کہ بابراعظم نے 125 ون ڈے انٹرنیشنل میں 55.98 کی اوسط سے 5 ہزار 990 رنز اسکور کررکھے تھے۔
لائیو ٹی وی