کراچی کے علاقے نارتھ کراچی میں پاور ہاؤس چورنگی کے قریب ڈمپر کی ٹکر سے موٹرسائیکل سوار شخص زخمی ہوگیا، ڈرائیور نے فرار کی کوشش میں 2 موٹرسائیکلوں کو رونڈ ڈالا تاہم کوئی جانی نقصان نہیں ہوا، حادثے کے بعد مشتعل افراد نے 5 ڈمپر اور 4 واٹر ٹینکر اور ایک ٹرک جلا دیا۔

واقعے کے خلاف ڈمپر ایسوسی ایشن نے سپر ہائی وے پر شدید احتجاج کیا جس کے بعد پولیس نے ڈمپر جلانے پر 19 افراد کو گرفتار کرلیا۔

ڈان نیوز کے مطابق رات گئے نارتھ کراچی پاور ہاؤس چورنگی کے قریب ڈمپر کی ٹکر سے موٹرسائیکل سوار زخمی ہوگیا۔

عینی شاہدین کے مطابق 17 سے 18 سال کا ڈمپر ڈرائیور ریس لگاتا ہوا آرہا تھا جس نے موٹرسائیکل کو ٹکر ماری اور پھر کئی موٹرسائیکلوں کو روندتا ہوا فرار ہوگیا جس کے باعث 2 موٹرسائیکلیں تباہ ہوگئیں، تاہم خوش قسمتی سے کوئی جانی نقصان نہیں ہوا۔

واقعے کے بعد علاقے میں حالات کشیدہ ہوگئے، عینی شاہدین کے مطابق جائے وقوع پر موجود نوجوانوں نے پاور ہاؤس چورنگی سے صائمہ عربین ولاز تک ڈمپر کا تعاقب کیا، اس دوران ڈمپر کو روکنے کی کوشش میں ایک نوجوان زخمی بھی ہوا۔

واقعے کے بعد مشتعل افراد نے پاور ہاؤس چورنگی پر 5 ڈمپر اور فور کے چورنگی اور بابا موڑ کے قریب 4 واٹر ٹینکر اور ایک ٹرک کو آگ لگادی۔

آگ کی اطلاع پر فائر بریگیڈ کا عملہ فوری طور پر جائے وقوع پر پہنچا اور آگ بجھا دی۔

واقعے کے بعد ڈمپر ایسوسی ایشن کے صدر لیاقت محسود جائے وقوع پر پہنچے اور احتجاج کا اعلان اور واقعے میں ملوث ملزمان کو گرفتار کرنے کا مطالبہ کیا۔

بعد ازاں ڈمپرز کے مالکان نے سپر ہائی وے پر کچرے سے بھرے ڈمپروں سے کچرا سڑک پرالٹ کر دونوں ٹریک ٹریفک کے لیے بند کردیے جس کے باعث ہیوی ٹریفک کی لمبی قطاریں لگ گئی۔

انسداد دہشت گردی کی دفعات کے تحت 5 مقدمات درج

وزیر داخلہ سندھ ضیاالحسن لنجار نے واقعے کا نوٹس لیتے ہوئے ملزمان کو جلد گرفتار کرنے کے احکامات دیے، پولیس اور مظاہرین میں مذاکرات کامیاب ہونے پر سپر ہائی وے پر احتجاج ختم کردیا گیا جبکہ مظاہرین پر امن منتشر ہوگئے۔

دریں اثنا، کراچی پولیس نے ڈمپر جلانے پر سرسید، بلال کالونی، نیو کراچی اور خواجہ اجمیر نگری تھانے میں انسداد دہشت گردی کی دفعات کے 5 مقدمات درج کرلیے۔

ایس ایس پی وسطی ذیشان شفیق کے مطابق جلاؤ گھیراؤ میں ملوث افراد کے خلاف سی سی ٹی وی فوٹیج موبائل فون ویڈیو اور دیگر ذرائع سے نشاندہی کے بعد 19 ملزمان کو گرفتار کرلیا گیا، جبکہ مزید گرفتاریوں کے لیے چھاہے مارے جارہے ہیں۔