کراچی میں سمندری ہوائیں معطل، آج بھی درجہ حرارت 41 ڈگری تک پہنچنے کا امکان
کراچی میں سمندری ہوائیں معطل ہونے کی وجہ سے آج بھی ہیٹ ویو کا امکان ہے، محکمہ موسمیات کا کہنا ہے کہ کراچی میں 23 اپریل تک ہیٹ ویو کا امکان برقرار ہے۔
ڈان نیوز کے مطابق شہر قائد میں آج بھی غیر فعال سمندری ہواؤں اور بلوچستان کی گرم ہواؤں کے باعث موسم شدید گرم رہنے کا امکان ہے، دن بھر لو کے تھپیڑے چلنے کی توقع ہے۔
محکمہ موسمیات نے کہا ہے کہ آج کم سے کم درجہ حرارت 25 ڈگری سینٹی گریڈ ریکارڈ کیا گیا، جب کہ زیادہ سے زیادہ درجہ حرارت 39 سے 41 ڈگری سینٹی گریڈ رہنے کا امکان ہے۔
ماہرین نے شہریوں کو خبردار کیا ہے کہ غیر ضروری طور پر گھروں سے باہر نہ نکلیں، بزرگ، اور بچوں کو گرم موسم میں خصوصی احتیاط کی ضرورت ہے، پانی کا استعمال زیادہ سے زیادہ کیا جائے۔
کراچی میں اتوار کے روز زیادہ سے زیادہ درجہ حرارت 40.4 ڈگری سینٹی گریڈ ریکارڈ کیا گیا تھا۔
یاد رہے کہ سال 2024 میں سندھ کے دارالحکومت کراچی میں گرمی کی شدت میں اضافے اور ہیٹ ویو کے پیش نظر میٹرک کے امتحانات ملتوی کردیے گئے تھے۔
نیشنل ڈیزاسٹر مینجمنٹ اتھارٹی (این ڈی ایم اے) اور صوبائی ڈیزاسٹر مینجمنٹ اتھارٹی (پی ڈی ایم اے) نے سندھ میں ہیٹ ویو الرٹ جاری کیا تھا، جس کے بعد وزیر تعلیمی بورڈ اور جامعات سندھ کے حکم پر ثانوی تعلیمی بورڈ کراچی نے 21 سے 27 مئی کے درمیان ہونے والے میٹرک کے امتحانات ملتوی کیے تھے۔
لائیو ٹی وی