لاہور: مس کنڈکٹ پر 2 ڈاکٹرز معطل، ایک برخاست، غیر حاضر ڈاکٹرز کی تنخواہ بند کرنے کا حکم
پنجاب حکومت کے محکمہ اسپیشلائزڈ ہیلتھ کیئر اینڈ میڈیکل ایجوکیشن نے مس کنڈکٹ پر 2 ڈاکٹرز کو نوکری سے معطل اور ایک کو برخاست کردیا اور سرکاری ہسپتالوں سے غیر حاضر ڈاکٹرز کی تنخواہیں فوری بند کرنے کا حکم دیتے ہوئے ڈاکٹرز، نرسز اور عملے کی چھٹیوں پر پابندی عائد کردی۔
ڈان نیوز کے مطابق سروسز ہسپتال لاہور کے ڈاکٹر سلمان حسیب اور چلڈرن ہسپتال لاہور کے پی جی آر ڈاکٹر احمد یار کو معطل کردیا جبکہ جنرل ہسپتال لاہور کے ڈاکٹر محمد عامر بشیر کو نوکری سے برخاست کردیا گیا ہے۔
ترجمان محکمہ اسپیشلائزڈ ہیلتھ کیئر اینڈ میڈیکل ایجوکیشن کا کہنا تھا کہ بغیر اطلاع غیر حاضر رہنے والے ڈاکٹرز کے واپس متعلقہ ہسپتال رپورٹ کرنے کے بعد تنخواہ بحال کی جائے گی۔
اس حوالے سے تمام میڈیکل سپرنٹنڈنٹس کو ہدایات جاری کر دی گئی۔ ان کا کہنا تھا کہ محکمے نے ہسپتالوں سے بغیر اجازت غیر حاضر ہونے والے ڈاکٹرز کے خلاف تادیبی کارروائی شروع کر دی ہے، محکمہ اسپیشلائزڈ ہیلتھ کیئر اینڈ میڈیکل ایجوکیشن نے تمام ڈاکٹرز، نرسز اور الائیڈ ہیلتھ اسٹاف کی چھٹیوں پر بھی پابندی عائد کر دی ہے۔
لائیو ٹی وی