لاہور: گھروں میں کام کے بہانے چوریاں کرنیوالے خواتین گینگ کی سرغنہ گرفتار، 40 تولہ سونا برآمد
پنجاب کے دارالحکومت لاہور میں پولیس نے خواتین چور گینگ کی سرغنہ کو گرفتار کرکے کروڑوں روپے مالیت کے زیورات اور موبائل فونز برآمد کر لیے۔
ڈان نیوز کے مطابق پولیس ترجمان نے بتایا کہ اقبال ٹاؤن انویسٹی گیشن پولیس نے پیشہ ور ملزمہ کو گرفتار کیا اور ملزمہ کی نشاندہی پر ایک کروڑ روپے سے زائد مالیت کا 40 تولہ سونا، موبائل فونز اور دیگر قیمتی اشیا برآمد کرلیں۔
سپرنٹنڈنٹ آف پولیس (ایس پی) انویسٹی گیشن اقبال ٹاؤن نے بتایا کہ ملزمہ اور ساتھی خواتین گھروں میں کام کاج کے بہانے داخل ہوتی تھیں، اور گھر والوں کی غیر موجودگی یا موقع ملتے ہی گھر کا صفایا کر کے فرار ہو جاتی تھیں۔
پولیس حکام کے مطابق ملزمہ نے شہر کے مختلف علاقوں میں متعدد وارداتوں کا انکشاف کیا ہے۔
خواتین چور گینگ کی سرغنہ کو سی سی ٹی وی کیمروں اور ہیومن انٹیلی جنس کی مدد سے گرفتار کیا گیا ہے، ایس پی انویسٹی گیشن اقبال ٹاؤن نے برآمد ہونے والا مال مسروقہ مدعیان کے سپرد کر دیا۔
لائیو ٹی وی