پاک-بھارت کشیدگی کے بعد پہلی بار سامنے آنے پر فواد خان کو تنقید کا سامنا
معروف اداکار فواد خان کو حالیہ انسٹاگرام پوسٹ پر ایک بار پھر سوشل میڈیا پر تنقید کا سامنا کرنا پڑ رہا ہے۔
حال ہی میں فواد خان نے اپنے دوستوں کے ہمراہ لاہور کے ایک تھیٹر میں یاسر حسین کا ڈرامہ ’منکی بزنس‘ دیکھا۔
ڈرامے کے آفیشل انسٹاگرام اکاؤنٹ کی جانب سے فواد خان کی ایک ویڈیو شیئر کی گئی، جس میں انہوں نے کہا کہ انہوں نے ’منکی بزنس‘ کا تھیٹر ڈرامہ دیکھا ہے جو انہیں بے حد پسند آیا۔
اداکار نے تمام اداکاروں کی بھرپور تعریف کرتے ہوئے کہا کہ ڈرامے کے تمام فنکار بہت قابل ہیں۔
فواد خان نے یاسر حسین کی تعریف کرتے ہوئے کہا کہ وہ نہ صرف ایک بہترین لکھاری ہیں بلکہ بہت اچھے اداکار اور ہدایت کار بھی ہیں۔
اسی ویڈیو میں واسع چوہدری اور بلال لاشاری کو بھی ڈرامے کی تعریف کرتے ہوئے دیکھا جاسکتا ہے، تاہم تنقید کا نشانہ صرف فواد خان کو بنایا گیا۔
سوشل میڈیا پر ایک صارف نے فواد خان پر طنز کرتے ہوئے لکھا کہ اب فواد خان دوبارہ پاکستانی اداکاروں کے ساتھ گھلنے ملنے کی کوشش کر رہے ہیں کیونکہ ان پر بھارت میں پابندی لگ چکی ہے۔
ایک اور صارف نے لکھا کہ اب فواد خان پاکستانی اداکاروں کے ساتھ ہی نظر آئیں گے، خیر دیر سے عقل آئی مگر آتو گئی کہ اپنے ملک کے علاوہ کہیں عزت نہیں انسان کی۔
واضح رہے کہ فواد خان کو حالیہ پاک بھارت تنازع پر غیر جانبدارانہ مؤقف اختیار کرنے کی وجہ سے شدید عوامی ردعمل کا سامنا ہے۔
یہاں پر آپ کو یہ بھی بتاتے چلیں کہ فواد خان کی آنے والی بالی وڈ رومانوی فلم ’ابیر گلال‘ کی ریلیز بھی پاک بھارت کشیدگی کی وجہ سے روک دی گئی ہے۔
فلم کے گانے اور ٹیزرز بھی یوٹیوب سے ہٹا دیے گئے ہیں۔ فواد خان 9 سال بعد اس فلم کے ذریعے بالی وڈ میں واپسی کرنے جا رہے تھے۔
لائیو ٹی وی