پاکستان ریلوے نے رواں مالی سال کے 11 ماہ میں ریکارڈ 83 ارب روپے کا منافع کمالیا
پاکستان ریلوے (پی آر) نے 30 جون کو ختم ہونے والے مالی سال 25-2024 کے 11 ماہ (30 مئی تک) میں ریکارڈ 83 ارب روپے کما لیے۔
ڈان کو معلوم ہوا ہے کہ ریلوے حکام گزشتہ سال کی 88 ارب روپے کی آمدن کا ریکارڈ توڑنے کے لیے تیار ہے، امید ہے کہ 30 جون تک ریلوے کی آمدن 95 ارب روپے تک پہنچ جائے گی۔
ڈان اخبار کی رپورٹ کے مطابق پاکستان ریلوے کے چیف ایگزیکٹو افسر (سی ای او) عامر علی بلوچ نے دعویٰ کرتے ہوئے کہا کہ ’میرا خیال ہے کہ ہم 30 جون تک مجموعی طور پر 95 ارب روپے کی آمدنی حاصل کرنے میں کامیاب ہو جائیں گے‘۔
ریلوے انتظامیہ کے مطابق 30 مئی تک پاکستان ریلوے نے مسافر ٹرین آپریشنز سے 42 ارب روپے، مال بردار ٹرینوں سے 29 ارب روپے اور دیگر ذرائع سے 12 ارب روپے کمائے، جن میں زمین کی لیزنگ بھی شامل ہے۔
پی آر کی کراچی ڈویژن نے آمدنی کے لحاظ سے سب سے آگے رہتے ہوئے مسافر ٹرینوں سے 13 ارب روپے اور مال بردار ٹرینوں سے 25 ارب روپے کمائے، لاہور ڈویژن نے مسافر ٹرینوں سے 10 ارب روپے اور 75 کروڑ روپے کمائے، راولپنڈی اور ملتان ڈویژن نے مسافر ٹرینوں سے 4، 4 ارب روپے اور مال بردار ٹرینوں سے 8، 8 ارب روپے کی آمدنی حاصل کی۔
وزیر ریلوے حنیف عباسی نے ایک بیان میں کہا کہ 30 مئی تک حاصل شدہ 83 ارب روپے (11 ماہ میں) کی آمدنی پاکستان ریلوے کی تاریخ میں کبھی حاصل نہیں ہوئی، گزشتہ سال 30 مئی 2024 تک پی آر نے 77 ارب روپے کمائے تھے۔
مالی سال 24-2023 (جو 30 جون 2024 کو ختم ہوا تھا) میں پاکستان ریلوے نے 88 ارب روپے کی آمدنی حاصل کی تھی، جو مالی سال 23-2022 کی 63 ارب روپے کی آمدنی کے مقابلے میں 40 فیصد زیادہ تھی۔
گزشتہ سال کی آمدنی میں 47 ارب روپے ٹکٹوں کی فروخت سے، 28 ارب روپے مال برداری سے، اور 13 ارب روپے ریلوے کی زمین کی لیزنگ اور دیگر ذرائع سے حاصل ہوئے تھے، مالی سال 19-2018 میں پی آر کی آمدنی 45 ارب روپے تھی، جو 21-2020 میں بڑھ کر 48.5 ارب روپے اور 23-2022 میں 63.5 ارب روپے ہو گئی تھی۔
ریلوے انتظامیہ کا کہنا ہے کہ آمدنی میں اضافہ مسافر اور مال بردار خدمات کی بہتری کی وجہ سے ممکن ہوا، حالانکہ محکمے کے پاس وسائل محدود تھے۔
لائیو ٹی وی