کراچی میں 24 گھنٹوں کے دوران دسویں بار زلزلے کے جھٹکے محسوس کیے گئے، زلزلے کی شدت 2.4 ریکارڈ کی گئی۔

ڈان نیوز کے مطابق زلزلہ پیما مرکز کی جانب سے بتایا گیا ہے کہ رات 11 بج کر 16 منٹ پر محسوس کیے جانے والے زلزلے کے جھٹکوں کی گہرائی 10 کلومیٹر کے قریب تھی۔

زلزلے کے جھٹکے لانڈھی، قائدآباد سمیت دیگر علاقوں میں محسوس کیے گئے، کئی گھروں کی دیواروں میں دراڑیں پڑ گئیں اور شہری خوفزدہ ہو کر گھروں سے باہر نکل آئے۔

محکمہ موسمیات کے مطابق زلزلے کے جھٹکے آئندہ 2 روز تک محسوس کیے جا سکتے ہیں۔

واضح رہے کہ گزشتہ روز بھی کراچی میں زلزلے کے جھٹکے محسوس کیے گئے تھے، جس کے بعد قائد آباد، شیرپاؤ کالونی لانڈھی میں لوگوں کی بڑی تعداد گھروں سے باہر نکل آئی تھی۔

شیرپاؤ اسپورٹس کمپلیکس کو رات گئے عوام کے لیے کھول دیا گیا تھا، جہاں خواتین اور بچوں سمیت علاقہ مکینوں کی بڑی تعداد پہنچ گئی تھی اور کئی گھنٹے تک اسپورٹس کمپلیکس میں وقت گزارا۔

بعض علاقوں میں رات گئے دعائیہ تقاریب اور مساجد میں خصوصی عبادات کا بھی اہتمام کیا گیا تھا۔

لانڈھی انڈسٹریل ایریا، قائدآباد میں زلزلے کے جھٹکے محسوس کیے جانے کے بعد مختلف فیکٹریوں سے مزدوروں کو باہر نکال دیا گیا تھا۔

یکم جون سے اب تک کراچی میں 19 بار زلزلہ

ارلی سونامی وارننگ سیل کراچی نے اعداد و شمار جاری کیے ہیں، جس کے مطابق یکم جون سے اب تک کراچی میں 19 بار زلزلہ آچکا ہے۔

ارلی سونامی وارننگ سیل کی رپورٹ کے مطابق سب سے زیادہ شدت کا زلزلہ 3.6 ریکارڈ کیا گیا، سب سے کم شدت کا زلزلہ 2.1 ریکارڈ کیا گیا ہے۔

منگل کی صبح 11 بج کر 34 منٹ پر ڈی ایچ اے سٹی سپر ہائی وے میں بھی زلزلے کے جھٹکے محسوس کیے گئے۔ زلزلے کی شدت 2.5 اور گہرائی 30 کلومیٹر ریکارڈ کی گئی۔

رپورٹ میں بتایا گیا ہے کہ زلزلے کامرکز 15 کلومیٹر ڈی ایچ اے کے شمال مشرق میں تھا۔