وزیراعظم سے ایم کیو ایم وفد کی ملاقات، وفاقی بجٹ پر مشاورت
وزیراعظم شہباز شریف سے کنوینر متحدہ قومی موومنٹ ڈاکٹر خالد مقبول صدیقی کی زیر قیادت ایم کیو ایم کے وفد نے اسلام آباد میں ملاقات کی جس میں وفاقی بجٹ پر مشاورت کی گئی۔
ایسوسی ایٹڈ پریس آف پاکستان (اے پی پی) کے مطابق وزیراعظم آفس کے میڈیا ونگ سے جاری بیان میں کہا گیا کہ خالد مقبول صدیقی کی سربراہی میں ایم کیو ایم پاکستان کے وفد میں وفاقی وزیر برائے قومی صحت سید مصطفیٰ کمال ، اراکین قومی اسمبلی امین الحق ، ڈاکٹر فاروق ستار اور جاوید حنیف شامل تھے۔
حکومت کی جانب سے ملاقات میں نائب وزیراعظم و وزیر خارجہ اسحٰق ڈار ، وفاقی وزیر منصوبہ بندی احسن اقبال ، وفاقی وزیر خزانہ محمد اورنگزیب ، وفاقی وزیر پارلیمانی امور ڈاکٹر طارق فضل چوہدری ، وفاقی وزیر برائے پبلک افیئرز یونٹ رانا مبشر اقبال، وزیراعظم کے مشیر برائے سیاسی امور و بین الصوبائی روابط رانا ثنااللہ اور وزیر اعظم کے معاون خصوصی طلحہ برکی موجود تھے۔
وزیراعظم نے ایم کیو ایم کے وفد سے وفاقی بجٹ برائے مالی سال 26۔2025 پر مشاورت کی جب کہ وفد نے وفاقی بجٹ کے حوالے سے اپنی تجاویز وزیراعظم کو پیش کیں۔
اس موقع پر شہباز شریف نے نے وفد سے گفتگو کرتے ہوئے کہا کہ کراچی(کے فور) پر کام کی رفتار کو تیز کیا جائے گا جب کہ کراچی- حیدرآباد پیکیج کے حوالے سے بھی کام تیز تر کرنے کی ہدایات جاری کی جا چکی ہیں۔
ان کا کہنا تھا کہ کراچی کے عوام کو ٹرانسپورٹ کی بہترین سہولیات دینے کے لئے گرین لائن منصوبہ وفاقی حکومت کی اولین ترجیحات میں شامل ہے۔
لائیو ٹی وی