الیکٹرک وہیکل چارجنگ اسٹیشنز کے قیام کا عمل تیز، جینکوز کی نیلامی جلد مکمل کی جائے، وزیراعظم
وزیرِ اعظم شہباز شریف نے ہدایت کی ہے کہ الیکٹرک وہیکل چارجنگ اسٹیشنز کے قیام کا عمل تیز کیا جائے، نقصان میں چلنے والی بجلی کی پیداواری کمپنیوں (جینکوز) کی نیلامی جلد مکمل کی جائے اور جینکوز کی نیلامی کے عمل کو میڈیا پر براہ راست نشر کیا جائے۔
ڈان نیوز کے مطابق ان خیالات کا اظہار وزیر اعظم شہباز شریف نے اسلام آباد میں بجلی کے شعبے کی جاری اصلاحات پر جائزہ اجلاس سے خطاب کرتے ہوئے کیا، وزیراعظم نے ہدایت کی کہ بجلی کی تقسیم کار کمپنیوں کی نجکاری کے عمل کو بھی تیز کیا جائے۔
اجلاس کو بجلی شعبے کی پیدوار، ترسیل اور تقسیم کے حوالے سے جاری اصلاحات اور منصوبوں پر تفصیلی بریفنگ دی گئی۔
اجلاس میں وفاقی وزرا سردار اویس خان لغاری، احد خان چیمہ، علی پرویز ملک، مشیر وزیرِ اعظم محمد علی، وزیرِ مملکت بلال اظہر کیانی، نیشنل کوآرڈینیٹر پاور ٹاسک فورس لیفٹیننٹ جنرل ظفر اقبال، وزیرِ اعظم کے کو آرڈینیٹر مشرف زیدی اور متعلقہ اعلیٰ حکام نے شرکت کی۔
اجلاس کو بتایا گیا کہ وزیرِ اعظم کی ہدایت پر فرسودہ اور نقصان میں چلنے والے جینکوز کی نیلامی کا پہلا مرحلہ مکمل ہوگیا، جس سے قومی خزانے کو 9 ارب 5 کروڑ روپے کی آمدن ہوئی، جبکہ دوسرے اور تیسرے مرحلے کو مکمل کرنے کے لیے اقدمات تیزی سے جاری ہیں۔
اجلاس کو بتایا گیا کہ شفافیت کو یقینی بنانے کے لیے نیلامی کی کارروائی براہ راست نشر کی جاتی ہے. 36 انڈیپینڈنٹ پاور پروڈیوسرز (آئی پی پیز) کے ساتھ بجلی کے نرخوں کے حوالے سے کامیاب مذاکرات ہوئے جس کے نتیجے میں مجموعی طور ملکی خزانے کو 30 کھرب 69 ارب روپے کی بچت ہوگی۔
اجلاس کو مزید بتایا گیا کہ ملکی صنعتوں کو ٹرانسمیشن لائن پر لا کر انہیں بلاتعطل بجلی کی فراہمی یقینی بنائی جا رہی ہے، جس سے صنعتی پیدوار، برآمدات اور زرمبادلہ میں اضافہ ہوگا، نیشنل ٹرانسمیشن اینڈ ڈسپیچ کمپنی لمیٹڈ کو تحلیل کرکے انرجی انفرااسٹرکچر ڈیولپمنٹ کمپنی اور نیشنل گرڈ کمپنی تشکیل دی گئی، اور ان کو ذمہ داریاں سونپی جا رہی ہیں۔
اجلاس کو بتایا گیا کہ ملک بھر میں الیکٹرک وہیکلز کے فروغ کے لیے چارجنگ اسٹیشنز کے قیام کا عمل بھی تیزی سے جاری ہے، الیکٹرک وہیکل چارجنگ اسٹیشنز کے قیام کی درخواستوں کو وصول کرنے کے لیے آن لائن پورٹل فعال ہے، جس کے ذریعے 120 درخواستیں وصول کی جا چکی ہیں، جس میں سے 48 درخواستوں کو عبوری رجسٹریشن کی دستاویزات تفویض کی گئی ہیں، اسی طرح پہلے سے موجود چارجنگ اسٹیشنز کی ریگولرائیزیشن کا عمل بھی مکمل ہو چکا ہے۔
بریفنگ میں بتایا گیا کہ بجلی کے شعبے کی بہتری کے لیے پاور پلاننگ اور مانیٹرنگ کمپنی (پی پی ایم سی) کا قیام عمل میں لایا جاچکا ہے، ملک کی بیشتر تقسیم کار کمپنیوں کے انتظامی ڈھانچے کی تشکیل نو کی جاچکی، جو کہ اب مکمل طور پر فعال ہیں.
وزیرِ اعظم کو مٹیاری-مورو-رحیم یار خان، غازی بروتھا-فیصل آباد ٹرانسمیشن لائنز کے حوالے سے بھی بریفنگ دیتے ہوئے بتایا گیا کہ ان کی فنانسنگ میں مقامی و بین الاقوامی اداروں نے دلچسپی کا اظہار کیا ہے، آئندہ 6 سال میں 20 کھرب 40 ارب کے گرشی قرضے کے مکمل خاتمے کے لیے بھی لائحہ عمل سے آگاہ کیا گیا۔
اجلاس کو بتایا گیا کہ بجلی کی بچت کے لیے انرجی ایفیشنٹ پنکھوں کے فروغ کے حوالے سے بینکوں سے آسان شرائط پر قرضوں کی فراہمی کا لائحہ عمل تیار کیا جارہا ہے، تاکہ متوسط طبقے کے صارفین بجلی بچا کر بلوں میں کمی سے مستفید ہو سکیں، بجلی کی بچت کے لیے انرجی ایفیشنٹ عمارتوں کی تعمیر کے حوالے سے بھی روڈ میپ تیار ہے اور صوبائی حکومتوں سے بھی اس پر عملدرآمد پر مشاورت مکمل ہے۔
وزیر اعظم شہباز شریف نے کہا کہ عوامی ریلیف، صنعتوں کو بلا تعطل بجلی کی فراہمی اولین ترجیحات میں شامل ہے، نقصان کرنے والی جینکوز کی نیلامی جلد مکمل کی جائے، وزیراعظم جینکوز کی نیلامی کے عمل کو میڈیا پر براہ راست نشر کیا جائے۔
انہوں نے ہدایت کی کہ اسمارٹ میٹرز کی تنصیب مکمل کرکے جلد رپورٹ پیش کی جائے، بلوچستان کے ٹیوب ویلز کی سولرائزیشن کا عمل مکمل ہو چکا، بجلی کی تقسیم کار کمپنیوں کی نجکاری کے عمل کو تیز کیا جائے، ملک بھر میں الیکٹرک وہیکل چارجنگ اسٹیشنز کے قیام کے عمل کو تیز کیا جائے۔
لائیو ٹی وی