ہری پور : سوتیلی ماں نے ڈنڈوں کے وار سے 8 سالہ بچے کی جان لے لی
ہری پور میں سوتیلی ماں نے ڈنڈوں کے وار کر کے 8 سالہ بچے کو قتل کر دیا، پولیس نے ملزمہ کو گرفتار کرکے مقدمہ درج کرلیا ہے۔
ڈان نیوز کے مطابق ہری پور کے محلہ کھتہ کے رہائشی عنصر حسین کے8 سالہ بیٹے ریحان کی تشدد زدہ لاش گھر سے ملی تھی۔
پولیس کے مطابق مقتول ریحان کو اس کی سوتیلی ماں نے ڈنڈوں کے وار کرکے قتل کیا ہے، مقتول کے والد کے مطابق اس کی دوسری بیوی اس سے قبل بھی بچے پر تشدد کرتی رہتی تھی۔
پولیس نے بچے کے والد کی مدعیت میں مقدمہ درج کر کے ملزمہ کو گرفتار کر لیا ہے۔
واضح رہے کہ بچوں کے حقوق کے لیے کام کرنے والی غیر سرکاری تنظیم ’ساحل‘ کی اگست 2024 کی رپورٹ کے مطابق ملک بھر میں بچوں کے ساتھ بدسلوکی کے کل 1630 کیسز رپورٹ ہوئے۔
اس کے علاوہ سال 2024 کے ابتدائی 6 ماہ میں بچوں کے ساتھ جنسی زیادتی کے 862، اغوا کے 668، گمشدگی کے 82 اور کم عمری کی شادیوں کے 18 کیسز رپورٹ ہوئے۔
6 ماہ کے اعداد و شمار سے پتا چلتا ہے کہ رپورٹ ہونے والے کل کیسز میں سے 962 متاثرین میں 59 فیصد لڑکیاں تھیں جب کہ 668 یعنی 41 فیصد لڑکے تھے۔
لائیو ٹی وی