عمران خان کے بیٹے پاکستان آکر تحریک کا حصہ بنیں گے، علیمہ خان
پاکستان تحریک انصاف (پی ٹی آئی) کے بانی عمران خان کی ہمشیرہ علیمہ خان نے کہا ہے کہ بانی نے کہا کہ سارے دروازے بند ہو گئے، اب صرف تحریک ہی راستہ ہے، جبکہ عمران خان کے بچے بھی پاکستان آکر تحریک میں حصہ لیں گے۔
اڈیالہ جیل کے باہر میڈیا سے گفتگو کرتے ہوئے علیمہ خان نے کہا کہ عمران خان نے تحریک کا آغاز کیا ہے اور کہا ہے کہ سارے دروازے بند ہو گئے ہیں، اب صرف تحریک ہی راستہ ہے اور کوئی راستہ نہیں۔
ایک سوال کے جواب میں انہوں نے کہا کہ پی ٹی آئی کی لیڈرشپ تحریک کی تاریخ دے گی، عمران خان نے صرف یہ ہدایت دی ہے کہ تحریک کا عروج 5 اگست کو ہوگا۔
علیمہ خان نے کہا کہ عمران خان کے بیٹوں سلیمان اور قاسم نے کہا ہے کہ وہ پاکستان آئیں گے اور تحریک کا حصہ بنیں گے، پہلے وہ امریکا جارہے ہیں وہاں وہ انسانی حقوق کے اداروں کو بتائیں گے کہ ان کے والد کے ساتھ کیا ظلم ہو رہا ہے۔
انہوں نے کہا کہ عمران خان نے کہا ہے کہ پاکستانی اپنی آزادی کے لیے کھڑے ہوں، رول آف لا کے لیے کھڑے ہوں، آپ کے جو 26ویں ترمیم کے بعد سارے حقوق چھین لیے گئے، عدلیہ نے بھی آپ کو انصاف دینا چھوڑ دیا، تو اب آپ اس ظلم کے خلاف کھڑے ہوں، اپنی آزادی کے لیے کھڑے ہوں۔
ایک سوال کے جواب میں علیمہ خان کا کہنا تھا کہ عمران خان نے کہا ہے، جو تحریک کا بوجھ نہیں اٹھا سکتے وہ اپنے عہدوں سے ہٹ جائیں۔
انہوں نے مزید کہا کہ عمران خان نے مذاکرات کی کوئی بات نہیں کی ہے، عمران خان نے تحریک کی بات کی ہے، انہوں نے تحریک کا آغاز کر دیا ہے۔
لائیو ٹی وی