بلوچستان : صوبائی اپیکس کمیٹی کا اجلاس، سیکیورٹی، اسمگلنگ، اور عوامی مفاد سے متعلق اہم فیصلے
وزیر اعلیٰ بلوچستان میر سرفراز بگٹی کی زیر صدارت صوبائی اپیکس کمیٹی کا انیسواں اجلاس ہوا جس میں سیکیورٹی، اسمگلنگ، اور عوامی مفاد سے متعلق اہم فیصلے کیے گئے۔
ڈان نیوز کے مطابق وزیر اعلیٰ بلوچستان میر سرفراز بگٹی کی زیر صدارت صوبائی اپیکس کمیٹی کا انیسواں اجلاس منعقد ہوا جس میں کور کمانڈر بلوچستان سمیت اعلیٰ عسکری و سول حکام نے شرکت کی۔
اجلاس میں اپیکس کمیٹی نے اسمگلنگ کے خلاف جاری مہم کو مزید مؤثر بنانے کا فیصلہ کیا اور واضح کیا کہ اسمگلنگ میں ملوث ٹرانسپورٹ کمپنیوں کے خلاف سخت کارروائی کی جائے گی جب کہ ملوث ڈرائیورز کے خلاف ایف آئی آرز درج ہوں گی۔
اجلاس میں انسداد دہشت گردی ایکٹ کے رولز کو جلد حتمی شکل دینے کی ہدایت بھی جاری کی گئی، اجلاس میں فیصلہ کیا گیا کہ احتجاج کے نام پر بلوچستان کی کوئی بھی شاہراہ بند نہیں ہونے دی جائے گی۔
کمیٹی نے ایف آئی اے کو غیر قانونی ترسیلات زر اور ریاست مخالف سرگرمیوں میں ملوث افراد کے خلاف مؤثر کارروائی کی ہدایت کی، اجلاس میں سوشل میڈیا پر ریاست مخالف پروپیگنڈے میں ملوث اکاؤنٹس کے خلاف کارروائی تیز کرنے کا فیصلہ بھی کیا گیا۔
وزیر اعلیٰ میر سرفراز بگٹی نے کہا کہ کرپشن، بھتہ خوری، اور غیر قانونی ترسیلات زر کو ہر صورت روکا جائے گا، ان کا کہنا تھا کہ نوجوانوں کومنشیات سے بچانا ناگزیر ہوچکا ہے، ریاست کسی کو اپنے خلاف کام کرنے کی اجازت نہیں دے گی۔
اجلاس میں بولان روٹ کی توسیع، ڈیرہ مراد جمالی بائی پاس، اور ویسٹرن بائی پاس کوئٹہ کی تکمیل سمیت مختلف ترقیاتی منصوبوں پر پیش رفت کا بھی جائزہ لیا گیا، اپیکس کمیٹی نے این ایچ اے کو ہدایت دی کہ ویسٹرن بائی پاس منصوبہ پچیس دسمبر تک مکمل کیا جائے۔
اجلاس میں فیصلہ کیا گیا کہ ایل ایچ ایس پیٹرولیم مصنوعات کے ٹینکرز کو شہری علاقوں میں داخلے کی اجازت نہیں دی جائے گی، جبکہ پٹ فیڈر کینال منصوبے کو ایف سی سیکیورٹی فراہم کرے گی۔
وزیر اعلیٰ نے واضح کیا کہ اگر وفاقی ادارے سڑکوں کی تعمیر میں تاخیر کریں گے تو صوبائی حکومت خود یہ منصوبے مکمل کرے گی تاکہ عوامی مفاد کا تحفظ یقینی بنایا جا سکے ۔
اپیکس کمیٹی نے اٹھہتر ویں یوم آزادی اور ’ معرکہ حق’ کو جوش و جذبے سے منانے کا بھی اعلان کیا۔
لائیو ٹی وی