سینیئر صحافی زبیدہ مصطفیٰ انتقال کرگئیں
سینیئر صحافی زبیدہ مصطفیٰ انتقال کرگئیں۔
کراچی پریس کلب کی جانب سے جاری بیان کے مطابق خاندانی ذرائع نے تصدیق کی ہے کہ سینیئر صحافی زبیدہ مصطفیٰ بدھ کے روز کراچی میں انتقال کرگئیں۔
کے پی سی اعلامیہ کے مطابق زبیدہ مصطفیٰ پاکستانی صحافت کی ایک عظیم علامت اور سینئر صحافی تھیں، وہ آج اس جہانِ فانی سے کوچ کرگئیں، مگر اپنے پیچھے ایک ایسی میراث چھوڑ گئیں جو آنے والی نسلوں کے صحافیوں کے لیے ہمیشہ مشعلِ راہ بنی رہے گی۔
زبیدہ مصطفیٰ صرف ایک صحافی نہیں تھیں بلکہ وہ اپنی ذات میں خود ایک ادارہ تھیں، سچائی سے ان کی وابستگی، ان کا گہرا تجزیہ اور سماجی انصاف کے لیے ان کی بے لوث جدوجہد نے صحافتی اقدار کا ایک اعلیٰ معیار قائم کیا۔
بیان میں مزید کہا گیا ہے کہ وہ بلاشبہ ایک رہنما تھیں، جنہوں نے مردوں کے غلبے والے شعبے میں رکاوٹیں توڑیں اور خواتین کے لیے راستے ہموار کیے، سماجی مسائل، تعلیم اور صحت پر ان کا کام بے حد مؤثر رہا، جو ان کی گہری ہمدردی اور عام لوگوں کی زندگی بہتر بنانے کے عزم کی گواہی دیتا ہے۔
بیان میں کہا گیا ہے کہ زبیدہ مصطفیٰ کی کمی ہمیشہ محسوس کی جائے گی، لیکن صحافت اور معاشرے کے لیے ان کی خدمات کو کبھی فراموش نہیں کیا جائے گا۔
لائیو ٹی وی