مالی سال 25-2024 میں پاکستان ریلویز کی 93 ارب روپے کی تاریخ ساز آمدن
مالی سال 25-2024 میں پاکستان ریلویز نے آمدنی کے تمام سابقہ ریکارڈ توڑتے ہوئے 93 ارب روپے کی آمدن حاصل کرلی۔
ترجمان ریلوے کے مطابق ریلوے نے جون میں ختم ہونے والی مالی سال میں آمدنی کے تمام ریکارڈ توڑتے ہوئے 93 ارب روپے کی ریکارڈ آمدن حاصل کی۔
ترجمان کے مطابق ملٹری ٹریفک سے ڈیڑھ ارب جبکہ دیگر کوچنگ ذرائع سے 3 ارب روپے کی آمدن ہوئی جبکہ متفرق ذرائع سے ساڑھے 9 ارب روپے حاصل ہوئے۔
ترجمان ریلوے کے مطابق ریلوے کی 78 سالہ تاریخ میں یہ آمدن کی بلند ترین سطح ہے، گزشتہ سال پاکستان ریلویز نے 88 ارب روپے کمائے تھے۔
ترجمان کے مطابق مسافر ٹرین کے شعبے سے آمدن میں کراچی ڈویژن پونے 15 ارب روپے کی آمدن کے ساتھ سب سے آگے رہا، اسی طرح سوا 11 ارب سے زائد آمدن کے ساتھ لاہور دوسرے نمبر پر رہا، اس کے علاوہ مال بردار گاڑیوں میں کراچی نے 28 ارب اور ملتان نے ایک ارب روپے کمائے۔
وزیر ریلوے حنیف عباسی نے کہا کہ محدود وسائل کے ساتھ شاندار کارکردگی پر ریلوے انتظامیہ تعریف کی مستحق ہے، اگلے سال مال گاڑیوں سے70 فیصد تک انکم جنریشن ممکن بنائیں گے، انہوں نے کہا کہ اپنے مزدور کو سلام پیش کرتا ہوں جس نے ادارے کے استحکام کے لیے خون پسینہ بہایا۔
لائیو ٹی وی