بلوچستان: ژوب میں 9 مسافروں کو شہید کرنے کا مقدمہ درج
محکمہ انسداد دہشتگردی کے ذرائع کے مطابق 9 معصوم شہریوں کو شہید کرنے کے کا مقدمہ تھانہ سی ٹی ڈی ژوب میں نامعلوم افراد کے خلاف درج کر لیا گیا۔
ڈان نیوز کے مطابق ایس ایچ او لیویز تھانہ کی مدعیت میں مقدمہ قتل، اقدام قتل اور دہشتگردی کی دیگر دفعات کے تحت درج کیا گیا۔
واضح رہے کہ گزشتہ روز دہشت گردوں نے کوئٹہ سے پنجاب کے مختلف شہروں میں جانے والی 2 مسافر بسوں کو ضلع کے ژوب اور لورالائی کی سرحد پر واقع سورڈکئی کے علاقے میں روکا، بسوں سے 9 شہریوں کو شناخت کر کے پہلے اغوا کیا اور بعدازاں انہیں شہید کر دیا گیا تھا۔
افسوس ناک واقعے میں شہید ہونے والے افراد کی میتیں ان کے آبائی علاقوں میں پہنچا دی گئیں تھیں۔
بلوچستان میں بسوں سے اتار کر بے دردی سے شہید کیے گئے 9 مسافروں کا تعلق لاہور، گجرات، خانیوال، گوجرانولہ، لودھراں اور مظفر گڑھ سے تھا، شہدا میں ضلع لودھراں کی تحصیل دنیاپور کے رہائشی 2 سگے بھائی جابر اور عثمان اپنے والد کے جنازے میں شرکت کے لیے جا رہے تھے۔
شہید صابر حسین ولد محمد ریاض کا تعلق کامکی گوجرانولہ، شہید محمد آصف ولد سلطان کا تعلق چوک قریشی ڈیرہ غازی خان، شہید غلام سعید ولد غلام سرور کا تعلق خانیوال، شہید محمد جنید کا تعلق لاہور اور شہید محمد بلال ولد عبد الوحید کا تعلق اٹک جبکہ شہید بلاول کا تعلق گجرات سے تھا۔
اسسٹنٹ کمشنر ژوب نوید عالم نے ڈان ڈاٹ کام کو بتایا تھا کہ مجموعی طور پر 8 مسافروں کی شناخت ہوگئی تاہم ایک مسافر کے دستاویزات دہشت گرد اپنے ساتھ لے گئے اس لئے شناخت نہ ہوسکی تھی۔
حملے کی ذمہ داری فتنۃ الہندوستان سے تعلق رکھنے والی کالعدم تنظیم بلوچستان لبریشن فرنٹ نے قبول کی تھی، تنظیم کے ترجمان نے کہا تھا کہ انہوں نے موسیٰ خیل، مکھتر اور خجوری کے درمیان شاہراہ کو بند کرنے کے بعد ان 9 مسافروں کو قتل کیا تھا۔
لائیو ٹی وی