لاہور: سابق گورنر پنجاب عمر سرفراز چیمہ کی 2 مقدمات میں ضمانت کی درخواستوں پر فیصلہ محفوظ
لاہور کی انسدادِ دہشتگردی عدالت نے سابق گورنر پنجاب اور رہنما پاکستان تحریک کانصاف (پی ٹی آئی) عمر سرفراز چیمہ کی 2 مقدمات میں ضمانت کی درخواستوں پر فیصلہ محفوظ کر لیا۔
انسدادِ دہشت گردی عدالت میں ملزم کے وکیل نے دلائل دیے کہ عمر سرفراز چیمہ کو سیاسی بنیادوں پر مقدمات میں نامزد کیا گیا۔
تاہم سرکاری وکیل کا مؤقف تھا کہ ملزم تفتیش میں قصور وار ہیں، ان کی ضمانت خارج کی جائے۔
بعد ازاں، انسدادِ دہشت گردی عدالت کے جج نے وکلا کے دلائل کے بعد فیصلہ محفوظ کرلیا۔
واضح رہے کہ عمر سرفراز چیمہ کے خلاف تھانہ ریس کورس اور مغلپورہ میں مقدمات درج ہیں۔
خیال رہے کہ 9 مئی کو القادر ٹرسٹ کیس میں بانی پاکستان تحریک انصاف (پی ٹی آئی) عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا جس کے دوران فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔
مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاؤس بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو)کا ایک گیٹ بھی توڑ دیا تھا۔
اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی کے کارکنوں کے خلاف مقدمات بھی درج کیے گئے تھے۔
لائیو ٹی وی