3 روز قبل 100 ویں سالگرہ منانے والے مہاتیر محمد ’تھکن‘ کی وجہ سے ہسپتال میں داخل
ملائیشیا کے سابق وزیر اعظم مہاتیر محمد کو تھکن کی وجہ سے ہسپتال میں داخل کرا دیا گیا ہے، قبل ازیں میڈیا نے رپورٹ کیا تھا کہ وہ اپنی 100ویں سالگرہ کی پکنک تقریب کو جلدی چھوڑ کر چلے گئے تھے۔
برطانوی خبر رساں ادارے ’رائٹرز‘ کے مطابق مہاتیر محمد ملائیشیا کے 2 دہائیوں سے زائد عرصے تک وزیراعظم رہے، انہیں دل کا عارضہ لاحق رہا ہے، اور وہ بائی پاس سرجری کروا چکے ہیں۔ حالیہ برسوں میں انہیں متعدد بار ہسپتال میں داخل کیا گیا، اور اکتوبر 2024 میں سانس کی نالی کے انفیکشن کی وجہ سے وہ ہسپتال میں داخل ہوئے تھے۔
پیشے کے اعتبار سے ڈاکٹر اور 2022 تک رکنِ پارلیمنٹ رہنے والے مہاتیر محمد نے اتوار کو خود گاڑی چلا کر سالگرہ کی تقریب میں شرکت کی تھی، جو ان کی اہلیہ حسمہ محمد علی کی 99ویں سالگرہ (جو ایک دن پہلے تھی) کے موقع پر بھی منائی جا رہی تھی۔
مقامی میڈیا نے رپورٹ کیا کہ انہوں نے ایک گھنٹے تک سائیکل چلائی، جس کے بعد وہ تھکے ہوئے دکھائی دیے، ان کی سالگرہ جمعرات کے روز تھی۔
مہاتیر ملائیشیا میں 2003 تک 22 سال تک وزیر اعظم رہے، وہ 2018 میں دوبارہ وزیر اعظم بنے، جب انہوں نے اپوزیشن اتحاد کی قیادت کرتے ہوئے تاریخی فتح حاصل کی تھی، لیکن ان کی حکومت اندرونی اختلافات کی وجہ سے 2 سال سے بھی کم عرصے میں ختم ہوگئی تھی۔
لائیو ٹی وی