کراچی: شرافی گوٹھ میں ڈرم سے خاتون کی مسخ شدہ لاش برآمد
کراچی کے علاقے شرافی گوٹھ میں ملیر ندی کے قریب ڈرم سے ایک نامعلوم عورت کی لاش برآمد ہوئی ہے، پولیس کے مطابق یہ لاش تقریباً 25 دن پرانی ہے اور اس کی حالت انتہائی خراب ہے۔
پولیس کا کہنا ہے کہ لاش کو ہاتھ پاؤں باندھ کر ڈرم میں بند کیا گیا تھا، ابتدائی معائنے سے اندازہ لگایا گیا ہے کہ عورت کی عمر 30 سال کے لگ بھگ ہے، واقعے کے بارے میں بتایا گیا ہے کہ ملزمان ایک گاڑی میں سوار ہو کر آئے اور ڈرم کو مین روڈ پر پھینک کر فرار ہو گئے۔
لاش کو فوری طور پر جناح اسپتال منتقل کیا گیا، جہاں ڈاکٹروں نے بتایا کہ لاش سے شدید تعفن اٹھ رہا ہے، پولیس نے کیمیکل تجزیے کے لیے لاش کے نمونے حاصل کر لیے ہیں تاکہ موت کی وجہ اور وقت کا درست تعین کیا جا سکے۔
پولیس حکام کے مطابق مسخ شدہ لاش کی شناخت نہیں ہو سکی، اور واقعے کی مزید تحقیقات جاری ہیں۔
پولیس کا کہنا ہے کہ سی سی ٹی وی فوٹیج حاصل کرنے اور گاڑی کا سراغ لگانے کی کوشش کی جا رہی ہے تاکہ ملزمان تک پہنچا جا سکے۔
پولیس حکام کا مزید کہنا ہے کہ یہ واقعہ ایک سنگین جرم کی طرف اشارہ کرتا ہے۔
لائیو ٹی وی