میانمار میں بھارتی فوج کے ڈرون حملے، علیحدگی پسند گروپ کے متعدد رہنما ہلاک
شمال مشرقی بھارت میں علیحدگی پسند گروپ نے کہا ہے کہ بھارتی فوج نے اتوار کے روز ہمسایہ ملک میانمار میں اُن کے کیمپوں پر سرحد پار ڈرون حملے کیے جس کے نتیجے میں ہمارے 3 رہنما ہلاک ہو گئے۔
غیر ملکی خبررساں ادارے ’اے ایف پی‘ کے مطابق یونائیٹڈ لبریشن فرنٹ آف آسام – انڈیپنڈنٹ (یو ایل ایف اے-آئی) نامی علیحدگی پسند گروپ نے ایک بیان میں کہا کہ میانمار میں سرحد کے قریب ایک ڈرون حملے میں ان کا ایک اعلیٰ کمانڈر مارا گیا جب کہ 19 دیگر افراد زخمی ہوئے۔
بھارتی اخبار ہندوستان ٹائمز کے مطابق و ایل ایف اے-آئی نے دعویٰ کیا کہ اس حملے میں 150 سے زائد اسرائیلی ساختہ ڈرون استعمال کیے گئے۔
یو ایل ایف اے-آئی کی جانب سے جاری بیان میں مزید کہا گیا کہ بعد کے حملوں میں ہمارے دو مزید سینئر کمانڈر مارے گئے۔
گروپ نے دعویٰ ہے کیا کہ سرحد پار سے ہونے والی حملوں میں کئی دیگر ارکان اور شہری بھی زخمی ہوئے ہیں۔
بھارتی اخبار دی ہندو نے رپورٹ کیا کہ گروپ کے مطابق بعد کے حملے میزائلوں سے کیے گئے اور ان میں ڈرون حملے میں مارے جانے والے کمانڈر کے جنازے کو نشانہ بنایا گیا۔
بھارتی حکام نے تاحال ان حملوں کی تصدیق نہیں کی ہے۔
یونائیٹڈ لبریشن فرنٹ آف آسام – انڈیپنڈنٹ نے مزید کہا کہ ایک اور باغی گروپ پیپلز لبریشن آرمی (پی ایل اے) کے کیمپوں کو بھی نشانہ بنایا گیا۔
خیال رہے کہ یو ایل ایف اے-آئی بھارت کے کئی علیحدگی پسند گروپوں میں سے ایک ہے، جو شمال مشرقی ریاست آسام کی آزادی چاہتا ہے، جب کہ پی ایل اے منی پور ریاست کی علیحدگی کا مطالبہ کرتا ہے۔
یو ایل ایف اے-آئی کے ایک دھڑے نے 2023 میں بھارتی حکومت کے ساتھ ہتھیار ڈال کر امن معاہدہ کر لیا تھا۔
بھارتی اخبار دی ڈکن ہیرالڈ کے مطابق گروپ میں اختلاف ہوا اور مذاکرات کے مخالف ارکان یو ایل ایف اے-آئی دھڑے میں شامل ہو گئے۔
علیحدگی پسند حملوں میں حالیہ برسوں میں کافی کمی آئی ہے، لیکن گزشتہ تین دہائیوں میں اس تشدد نے ہزاروں افراد کی جانیں لی ہیں، جن میں زیادہ تر عام شہری شامل ہیں۔
لائیو ٹی وی