لکی مروت: بیٹنی قومی تحریک کے مسلح احتجاج کے بعد کریک ڈاؤن، 20 افراد گرفتار،اسلحہ برآمد
لکی مروت میں مروت بیٹنی قومی تحریک کے خلاف پولیس نے کریک ڈاؤن کرتے ہوئے سربراہ انعام اللہ کی قیادت میں مسلح احتجاج کے بعد درجنوں کارکنوں کیخلاف مقدمات درج کرتے ہوئے 20 افراد کو گرفتار کرکے اسلحہ بھی برآمد کرلیا۔
ڈان نیوز کے مطابق مروت بیٹنی قومی تحریک کی جانب سے مسلح احتجاج کے بعد پولیس حرکت میں آگئی ہے، اور کریک ڈاؤن شروع کر دیا ہے، درج کیے گئے مقدمات میں دہشت گردی، اشتعال انگیزی، سڑک بلاک کرنے اور امن عامہ میں خلل کی دفعات شامل کی گئی ہیں۔
پولیس نے کارروائی کرتے ہوئے 20 افراد کو گرفتار کر کے ان کی فہرست جاری کردی ہے، گرفتار افراد میں تحریک کے سرگرم کارکن شامل ہیں، متعدد مقامی سطح پر متحرک تھے۔
گرفتار شدگان میں 4 افراد کا تعلق پولیس اور فیڈرل کانسٹیبلری (ایف سی) سے ہے، ان کے قبضے سے اسلحہ بھی برآمد کیا گیا ہے۔
پولیس حکام کا کہنا ہے کہ قانون ہاتھ میں لینے والوں کو کسی صورت معاف نہیں کیا جائے گا، مشران اور پولیس حکام کے درمیان جاری مذاکرات کے باوجود صورتحال بدستور کشیدہ ہے۔
یاد رہے کہ خیبرپختونخو ا کے ضلع لکی مروت میں اتوار کی شام تیجوری روڈ پر مروت بیٹنی قومی تحریک کے سربراہ انعام اللہ کی گاڑی پر دیسی ساختہ بم (آئی ای ڈی ) سے حملہ کیا گیا تھا، جس کے نتیجے میں ایک شخص ہلاک اور تین دیگر زخمی ہوئے تھے۔
3 دہشت گردوں کے بھی مارے جانے کی اطلاعات ملی تھیں، تاہم سیاسی رہنما انعام اللہ حملے میں محفوظ رہے تھے۔
لائیو ٹی وی