ورلڈ چیمپئنز آف لیجنڈز لیگ میں پاکستان کا فاتحانہ آغاز، انگلینڈ کو 5 رنز سے شکست دے دی
ورلڈ چیمپئنز آف لیجنڈز لیگ کا رنگا رنگ میلہ برطانیہ میں شروع ہو گیا، پاکستانی لیجنڈز پر مشتمل ٹیم نے پہلے میچ میں میزبان انگلینڈ کو دلچسپ مقابلے کے بعد 5 رنز سے شکست دے دی ہے۔
برمنگھم میں کھیلے جانے والے ٹی 20 میچ میں پاکستان نے پہلے بیٹنگ کرتے ہوئے 9 وکٹوں کے نقصان پر 160 رنز بنائے، پاکستان کی جانب سے کپتان محمد حفیظ نے شاندار 54 رنز کی اننگز کھیلی، جب کہ عامر یامین 27 رنز بنا کر نمایاں رہے۔
انگلینڈ کی جانب سے لیام پلنکٹ اور کرس ٹریملٹ نے 2-2 وکٹیں اپنے نام کیں۔
ہدف کے تعاقب میں پاکستانی بولرز کی نپی تلی بولنگ کے سامنے حریف ٹیم کے بیٹرز کو دشواری کا سامنا رہا، انگلش بلے باز مقررہ 20 اوورز میں 3 وکٹوں کے نقصان پر 155 رنز پر ہی ہمت ہار گئے ۔
انگلینڈ کی جانب سے فل مسٹرڈ اور این بیل کی ففٹیز راہیگاں گئیں، فِل مسٹرڈ 54 رنز بنا کر سہیل تنویر کا شکار بنے جب کہ این بیل 51 رنز بنا کر ناٹ آؤٹ رہے۔
پاکستان کی جانب سے رومان رئیس، سہیل تنویر اور عامر یامین ایک، ایک وکٹیں حاصل کرنے میں کامیاب رہے۔
پاکستانی لیجنڈز پر مشتمل ٹیم کی قیادت محمد حفیظ کر رہے ہیں، قومی اسکواڈ میں سابق کپتان شاہد آفریدی، فواد عالم، کامران اکمل، عماد وسیم ٹیم میں شامل ہیں۔
سابق کپتان شعیب ملک، سہیل تنویر، وہاب ریاض اور آصف علی اسکواڈ کا حصہ ہیں، عامر یامین، عمر امین، رومان رئیس ، شرجیل خان اور سہیل خان بھی قومی ٹیم میں شامل ہیں۔
پہلا مقابلہ جیتنے کے بعد پاکستان 20 جولائی کو روایتی حریف بھارت کے خلاف ایجبیسٹن کے میدان میں اُترے گا، 25 جولائی کو قومی ٹیم کا مقابلہ جنوبی افریقہ سے شیڈو ل ہے، 26 جولائی کو ویسٹ انڈیز اور 29 جولائی کو آسٹریلیا کے خلاف قومی ٹیم اپنی قسمت آزمائے گی۔
ورلڈ چیمپئنز آف لیجنڈز لیگ کے دوسرے سیزن میں میزبان انگلینڈ، پاکستان، بھارت، جنوبی افریقہ، ویسٹ انڈیز اور آسٹریلیا کی ٹیمیں ان ایکشن ہوں گی۔
لائیو ٹی وی