اجرک کی آڑ میں لوٹ مار جاری، وزرا اور ان کے بچے فینسی نمبر پلیٹس استعمال کرتے ہیں، فاروق ستار
متحدہ قومی موومنٹ (ایم کیوایم) پاکستان کے رہنما ڈاکٹر فاروق ستار نے گاڑیوں اور موٹرسائیکلوں کی نمبر پلیٹس کی تبدیلی کے معاملے پر سندھ حکومت کو کڑی تنقید کا نشانہ بناتے ہوئے کہا ہے کہ اجرک کی آڑ میں لوٹ مار کا دھندا جاری ہے جبکہ پیپلزپارٹی کے وزرا اور ان کے بچے فینسی نمبر پلیٹس استعمال کرتے ہیں۔
کراچی میں پارٹی رہنماؤں کے ساتھ پریس کانفرنس کرتے ہوئے ڈاکٹر فاروق ستار نے کہا کہ پیپلزپارٹی کے غیرجمہوری طرز عمل سے سندھ میں غم و غصہ ہے، اگر احتجاج کا راستہ نہ اپنایا گیا تو عوام اپنا راستہ خود نہ نکال لیں۔
انہوں نے کہاکہ سندھ میں پیپلز پارٹی کا طرز حکمرانی بدترین ہے، ایم کیوایم نے پیپلزپارٹی کو بہتری کے لیے کافی وقت دیا ہے، پیپلزپارٹی کوپتہ بھی نہیں چلےگاکب انکے پیروں تلے زمین نکل جائےگی۔
فاروق ستار نے کہاکہ اجرک والی نمبر پلیٹ کا مذموم مقصد ہے، کراچی میں کھلے عام موٹرسائیکل سواروں کو لوٹا جارہا ہے، انہوں نے کہاکہ اجرک عزت و احترام کی علامت ہے تاہم کراچی میں اجرک کی آڑ میں لوگوں کولوٹاجارہاہے، اجرک کی آڑمیں لوٹ مارکا دھندا شروع کردیا گیا ہے۔
انہوں نے کہاکہ پیپلزپارٹی کی حکومت نے کراچی کوتباہ کردیا ہے، وزرا اور ان کے بچےفینسی نمبرپلیٹ استعمال کرتےہیں جبکہ اندرون سندھ تو کوئی نمبرپلیٹ استعمال ہی نہیں کرتا، مگر کراچی کے لوگوں کو بےجا پابندیاں عائد کر کے ذبح کیاجارہاہے، ڈاکٹر فاروق ستار نے شہریوں کو مفت نمبر پلیٹس دینے کا مطالبہ کردیا۔
انہوں نے کہاکہ لیاری میں گرنےوالی مخدوش عمارت کےرہائشیوں کےلیےکچھ نہیں کیاگیا،صرف ایس بی سی اے پر ذمہ داری ڈال کرجان چھڑالی گئی، مخدوش عمارت کے رہائشیوں کو متبادل جگہ فراہم کرنا وزیر بلدیات کی ذمہ داری ہے۔
فاروق ستار نے مخدوش عمارتوں کےحوالے سے وزیربلدیات سے استعفے کا مطالبہ کرتے ہوئے کہا کہ مخدوش عمارتوں کےکیس میں وزیربلدیات کوایف آئی آرمیں شامل کیاجائے، سیہون کےافسران کی کراچی میں تعیناتی کی مذمت کرتےہیں،اس طرح کےاقدامات سےشہری اوردیہی آبادی میں نفرت بڑھ رہی ہے۔
لائیو ٹی وی