پی ٹی اے نے سیلاب کی صورتحال پر ٹیلی کام کمپنیوں کو ایڈوائزری جاری کردی
پاکستان ٹیلی کمیونیکیشن اتھارٹی (پی ٹی اے) نے سیلاب کی صورتحال پر ٹیلی کام کمپنیوں کو ایڈوائزری جاری کردی، پی ٹی اے نے قومی ایمرجنسی ٹیلی کمیونیکیشن کوآرڈینیشن سینٹر قائم کردیا۔
ڈان نیوز کے مطابق پی ٹی اے نے ملک بھر میں بارشوں کے باعث ممکنہ و جاری سیلابی صورت حال پر ٹیلی کمیونیکیشن کمپنیوں کو ایڈوائزری جاری کر دی ہے، ایڈوائزری میں تمام ٹیلی کمپنیوں کو ہنگامی صورتحال کے لیے متبادل منصوبے فعال کرنے کی ہدایت کی گئی ہے۔
ایڈوائزری میں ہدایت کی گئی ہے کہ سیلاب سے متاثرہ علاقوں میں موبائل، انٹرنیٹ سروس کی مسلسل فراہمی یقینی بنائی جائے، پی ٹی اے نے حساس علاقوں میں ٹیلی کام انفرااسٹرکچر کو محفوظ بنانے کی ہدایت کی ہے۔
ایڈوائزری میں ٹیلی کام آپریٹرز کو کہا گیا ہے کہ عوام کو ہنگامی نمبرز اور سیلاب کی معلومات قومی و علاقائی زبانوں میں فراہم کی جائیں، ہنگامی صورتحال میں ریلیف اہلکاروں کو ترجیحی بنیادوں پر مواصلاتی معاونت فراہم کی جائے۔
پی ٹی اے نے کہا کہ سیلاب زدہ علاقوں میں جہاں ضروری ہو، عارضی موبائل یونٹس نصب کیے جائیں، لوکل لوپ آپریٹرز سیلاب متاثرہ علاقوں میں اپنی فرنچائزز کو شکایات کے ازالے کے لیے متحرک کریں، ٹاپ اپ پوائنٹس پر بھی صارفین کی شکایات کے ازالے کے لیے متحرک ٹیمیں تعینات کی جائیں۔
ایڈوائزری میں کہا گیا ہے کہ صارفین کو سم، بیلنس ری چارج اور دیگر بنیادی سہولیات کی مسلسل فراہمی یقینی بنائی جائے، فیلڈ آپریشنز کے لیے تربیت یافتہ عملہ مقامی اور علاقائی سطح پر تعینات کیا جائے۔
لائیو ٹی وی