کوئٹہ: ڈیگاری میں جوڑے کے قتل کیس میں نامزد ملزم کا 2 روزہ جسمانی ریمانڈ منظور
بلوچستان کے دارالحکومت کوئٹہ کی مقامی عدالت نے ڈیگاری میں جوڑے کے قتل کیس میں نامزد ملزم بشیر احمد کا 2 روزہ جسمانی ریمانڈ منظور کرلیا۔
ڈان نیوز کے مطابق مقامی عدالت کی جانب سے ریمانڈ کی درخواست منظور کیے جانے پر ملزم بشیر احمد کو سیریس کرائم انویسٹی گیشن ونگ کے حوالے کر دیا گیا۔
دوسری جانب بلوچستان ہائیکورٹ میں ڈیگاری واقعے پر ازخود نوٹس کیس کی سماعت آج ہوگی، ایڈیشنل چیف سیکریٹری اور انسپکٹر جنرل (آئی جی) بلوچستان پیش ہوں گے۔
یاد رہے کہ بلوچستان کے دارالحکومت کوئٹہ کے نواحی علاقے مارگٹ میں دہرے قتل کی ابتدائی پوسٹ مارٹم رپورٹ رپورٹ سامنے آئی تھی، جس کے مطابق خاتون کو 7 اور مرد کو 9 گولیاں ماری گئی تھیں۔
پوسٹ مارٹم رپورٹ کے مطابق خاتون کی عمر 37 سے 38 برس کے قریب ہے، جن کے سر پر ایک جبکہ سینے اور پیٹ پر سات گولیاں ماری گئیں خاتون کے بازو پر نام نور بانو بی بی لکھا ہوا تھا اور اس کا تعلق ساتکزئی قبیلہ سے ہے۔
کوئٹہ کے نواح میں خاتون اور مرد کو قتل کرنے والے مرکزی ملزم بشیر احمد سمیت 20 افراد کو گرفتار کیا گیا تھا، گرفتار ملزمان میں ستکزئی قبیلے کے سربراہ شیرباز ستکزئی، ان کے 4 بھائی اور 2 محافظ بھی شامل ہیں، واقعے کا مقدمہ ہنہ اوڑک تھانے میں ایس ایچ او کی مدعیت میں درج کیا گیا تھا، جبکہ عدالت نے شیرباز ستکزئی کا 2 روزہ جسمانی ریمانڈ منظور کرلیا تھا۔
پولیس کے مطابق واقعے کا مقدمہ تھانہ ہنہ اوڑک میں ایس ایچ او نوید اختر کی مدعیت میں مقدمہ درج کیا گیا تھا، ایف آئی آر کے مطابق واقعے کی ویڈیو سوشل میڈیا پر وائرل ہوئی تھی، جس میں خاتون اور مرد کو فائرنگ کرکے قتل کرتے ہوئے دکھایا گیا تھا۔
وزیر اعلیٰ بلوچستان سرفراز بگٹی نے کہا تھا کہ کوئٹہ کے نواحی علاقے میں قتل ہونے والے افراد کے درمیان کوئی ازدواجی رشتہ نہیں تھا، دونوں پہلے سے شادی شدہ تھے اور ان کے بچے بھی ہیں۔
لائیو ٹی وی