نائلہ راجا نے ایک بار پھر عماد وسیم سے مبینہ تعلقات کی تردید کر دی
قومی کرکٹر عماد وسیم کے ساتھ مبینہ تعلقات کی خبروں پر سوشل میڈیا انفلوئنسر نائلہ راجا نے ایک بار پھر خاموشی توڑتے ہوئے واضح کیا ہے کہ ان کا کرکٹر سے کوئی ذاتی تعلق نہیں اور سوشل میڈیا پر پھیلائی جانے والی تمام افواہیں بے بنیاد ہیں۔
گزشتہ کئی دنوں سے سوشل میڈیا پر عماد وسیم کے سوشل میڈیا انفلوئنسر و وکیل نائلہ راجا سے مبینہ تعلقات کی افواہیں گردش کر رہی ہیں۔
اسی حوالے سے ایک ویڈیو بھی انٹرنیٹ پر وائرل ہوئی جس میں نائلہ راجا اور عماد وسیم کو لندن میں ساتھ دیکھا گیا، تاہم ویڈیو سے دونوں کے درمیان کسی قسم کے تعلق کی تصدیق نہیں ہوتی۔
یہ معاملہ اس وقت مزید توجہ کا مرکز بن گیا جب عماد وسیم کی اہلیہ ثانیہ اشفاق نے تیسرے بچے کی پیدائش کے موقع پر ایک مبہم پیغام شیئر کیا، جس سے ان افواہوں کو مزید تقویت ملی۔
بعدازاں نائلہ راجا نے انسٹاگرام پر ایک پوسٹ کے ذریعے اس معاملے کی تردید کرتے ہوئے کہا کہ ان کی عماد وسیم سے ملاقات محض اتفاقیہ تھی اور اس کے پیچھے کوئی اور مقصد نہیں تھا، ساتھ ہی انہوں نے خود کو اس تنازع سے دور رکھنے کی درخواست بھی کی۔
تاہم یہ معاملہ تاحال سوشل میڈیا کے مختلف پلیٹ فارمز پر زیر بحث ہے اور یہ قیاس کیا جا رہا ہے کہ عماد وسیم اور ان کی اہلیہ ثانیہ اشفاق کے درمیان تعلقات کشیدہ ہیں، جس کی وجہ نائلہ راجا سے ان کے مبینہ تعلقات کو قرار دیا جا رہا ہے، اس معاملے پر عماد وسیم کی جانب سے تاحال کوئی وضاحت سامنے نہیں آئی ہے۔
حال ہی میں نائلہ راجا نے ایک بار پھر عماد وسیم کے ساتھ مبینہ تعلق کی تردید کرتے ہوئے ایک تفصیلی پیغام جاری کیا، جس میں انہوں نے لکھا کہ گزشتہ کچھ دن ان کے لیے کسی ڈراؤنے خواب سے کم نہیں تھے، وہ ہمیشہ خود کو بہادر سمجھتی تھیں، لیکن جب کسی عورت کے کردار پر انگلی اٹھائی جائے تو مضبوط سے مضبوط عورت بھی کمزور پڑ جاتی ہے۔
انہوں نے بتایا کہ سوشل میڈیا پر انہیں ایسے ناموں سے پکارا گیا جن کے بارے میں انہوں نے کبھی تصور بھی نہیں کیا تھا، جیسے ’عماد وسیم کی محبوبہ‘، ’گھر توڑنے والی‘ اور ’کسی کے مرد کے پیسوں پر پلنے والی‘، یہ الفاظ ان کے لیے کسی چھری کی مانند تھے، لیکن شاید یہ بھی ان کی تقدیر کا حصہ تھا۔
نائلہ راجا کے مطابق ان کے اہلِ خانہ کو گمراہ کن ویڈیوز بھیجی گئیں اور خواتین نے ان کا مذاق اُڑانے کے لیے واٹس ایپ گروپس بنا کر ان کے خلاف باتیں کیں۔
انہوں نے کہا کہ وہ عماد وسیم، ان کی اہلیہ اور ان کے خاندان کا احترام کرتی ہیں اور اگر ان کے درمیان کوئی بھی مسئلہ ہے تو اس کی ذمے دار وہ نہیں ہیں، انہیں امید ہے کہ اس معاملے پر جلد ان کی جانب سے بھی وضاحت دی جائے گی۔
نائلہ راجا نے مزید کہا کہ ایک چھوٹی سی ویڈیو نے انہیں یہ سبق دے دیا کہ آئندہ کسی مرد سے بات کرنے سے پہلے انہیں دو بار سوچنا ہوگا، اب وہ جان چکی ہیں کہ دنیا چیزوں کو کس طرح توڑ موڑ کر پیش کرتی ہے۔
انہوں نے یہ بھی کہا کہ عماد وسیم سے مبینہ تعلق کی افواہیں پھیلانے والوں میں اکثریت خواتین کی تھی اور اس معاملے میں آگ لگانے اور اسے بڑھانے کا کام بھی انہوں نے کیا۔
انفلوئنسر نے کہا کہ ہاں، غلطی مرد سے ہو سکتی ہے، لیکن خواتین ہی اکثر اس کو بڑھاتی، بھڑکاتی اور تباہی کا ذریعہ بنتی ہیں۔
نائلہ راجا کے مطابق ان پر شہرت حاصل کرنے کا الزام بھی لگایا گیا، لیکن وہ یہ واضح کرنا چاہتی ہیں کہ انہوں نے ماضی میں بے شمار میڈیا پیشکشوں کو مسترد کیا ہے اور یہ دنیا انہیں متاثر نہیں کرتی۔
آخر میں انہوں نے سب سے گزارش کی کہ کسی کا تماشا نہ بنائیں اور اگر تماشا بن رہا ہو تو اس کا حصہ نہ بنیں۔
لائیو ٹی وی