ایلون مسک سیاست میں واپس آسکتے ہیں، اسپیس ایکس نے سرمایہ کاروں کو خبردار کردیا
بلومبرگ نیوز نے اطلاع دی ہے کہ ایلون مسک، جو حالیہ دنوں میں صدر ڈونلڈ ٹرمپ کے سینئر مشیر کے طور پر خدمات انجام دے چکے ہیں، ممکنہ طور پر دوبارہ امریکی سیاست میں سرگرم ہو سکتے ہیں۔
ڈان اخبار میں شائع خبر رساں ادارے ’رائٹرز‘ کی رپورٹ کے مطابق یہ انکشاف اسپیس ایکس کی دستاویزات اور اس سے واقف ذرائع کی بنیاد پر کیا گیا ہے۔
بلومبرگ کے مطابق اسپیس ایکس نے سرمایہ کاروں کو ارسال کردہ ایک ٹینڈر آفر کی دستاویزات میں بعض ’رسک فیکٹر‘ کے طور پر ایسی زبان شامل کی ہے، جس سے ایلون مسک کی سیاست میں واپسی کے امکانات ظاہر ہوتے ہیں، رپورٹ کے مطابق یہ پہلا موقع ہے کہ ان دستاویزات میں ایسی زبان دیکھی گئی ہے۔
رواں ماہ کے آغاز میں بلومبرگ نے یہ بھی رپورٹ کیا تھا کہ ایلون مسک کی کمپنی اسپیس ایکس اپنے اندرونی حصص کی فروخت کی منصوبہ بندی کر رہی ہے، جس سے کمپنی کی مجموعی مالیت تقریباً 400 ارب ڈالر تک پہنچ سکتی ہے۔
اتوار کو ایلون مسک نے سوشل میڈیا پلیٹ فارم ’ایکس‘ پر ایک پوسٹ میں بتایا تھا کہ وہ دوبارہ ہفتے کے ساتوں دن کام کر رہے ہیں اور دفتر ہی میں سوتے ہیں۔
دنیا کے امیر ترین شخص ایلون مسک نے گزشتہ سال تقریباً 30 کروڑ ڈالر خرچ کر کے صدر ٹرمپ اور دیگر ریپبلکن امیدواروں کی انتخابی مہمات کو سپورٹ کیا تھا، انہوں نے ٹرمپ انتظامیہ کی کفایت شعاری مہم کی قیادت کی، جس کے تحت کئی وفاقی اداروں کو ہدف بنایا گیا، تاہم وہ مطلوبہ بڑے پیمانے پر مالی بچت کے اہداف حاصل نہیں کر سکے۔
لائیو ٹی وی