پاکستان اور بنگلہ دیش کا سفارتی و سرکاری پاسپورٹس کو ویزا فری انٹری کی سہولت دینے کا فیصلہ
وفاقی وزیرداخلہ محسن نقوی نے ڈھاکا میں بنگلہ دیشی ہم منصب لیفٹیننٹ جنرل(ر) جہانگیر عالم چوہدری سے ملاقات کی ہے، اس موقع پر دونوں ملکوں نے سفارتی و سرکاری پاسپورٹس کو ویزا فری انٹری کی سہولت دینے کا اصولی فیصلہ کرلیا۔
وزیرداخلہ محسن نقوی کا ڈھاکا میں وزارت داخلہ آمد پر بنگلہ دیشی ہم منصب نے پرتپاک خیرمقدم کیا، اس موقع پر وزیرداخلہ محسن نقوی کو گارڈ آف آنرز پیش کیا گیا۔
ملاقات میں باہمی دلچسپی کے امور اور پاک بنگلہ دیش دوطرفہ تعلقات پر تبادلہ خیال کیا گیا جبکہ سفارتی و سرکاری پاسپورٹس پر ویزا فری انٹری پر بڑی پیش رفت سامنے آئی۔
اس موقع پر پاکستان اور بنگلہ دیش کا سفارتی و سرکاری پاسپورٹس کو ویزا فری انٹری کی سہولت دینے کا اصولی فیصلہ کیا، دونوں وزرائے داخلہ کا انٹرنل سکیورٹی اور پولیس ٹریننگ کے شعبوں میں تعاون بڑھانے پر بھی اتفاق کیا۔
دونوں وزرا نے انسداد منشیات اور انسداد انسانی اسمگلنگ کے لیے اشتراک کار بڑھانے پر بھی بات چیت کی جبکہ انسداد دہشت گردی کے لیے مشترکہ اقدامات اور پولیس اکیڈمیز میں ٹریننگ پروگرامز کے باہمی تبادلوں پر بھی گفتگو کی۔
بنگلہ دیشی وزیر داخلہ لیفٹیننٹ جنرل جہانگیر عالم چوہدری نے کہاکہ ڈھاکا آمد پر اپنے بھائی کو دل کی اتھاہ گہرائیوں سے خوش آمدید کہتے ہیں، آپ کا دورہ پاک بنگلہ دیش دوطرفہ تعلقات کو فروغ دینے کے لیے انتہائی اہم ہے۔
بنگلہ دیشی وزیر داخلہ نے پولیس کو تربیت فراہم کرنے کی پیشکش پر وزیر داخلہ محسن نقوی کا شکریہ اداکیا۔
اس موقع پر پاک بنگلہ دیش دوطرفہ تعاون کو فروغ دینے کیلئے مشترکہ کمیٹی تشکیل دی گی، پاکستان کی طرف سے وفاقی سیکرٹری داخلہ خرم آغا کمیٹی کے سربراہ ہوں گے۔
ملاقات میں طے پایا ہے کہ بنگلہ دیش کا اعلیٰ سطح کا وفد عنقریب سیف سٹی پراجیکٹ اور نیشنل پولیس اکیڈمی کا دورہ کرنے اسلام آباد آئے گا۔
ملاقات میں بنگلہ دیش کے وزیر مملکت داخلہ خدا بخش، سیکریٹری داخلہ نسیم الغنی، ایڈیشنل سیکریٹری سیکیورٹی ڈویژن شمیم خان، پاکستانی ہائی کمیشن کے ناظم الامور محمد واصف، پولیٹیکل قونصلر کامران دونگل اور اعلیٰ حکام بھی موجود تھے۔
لائیو ٹی وی