مسابقتی کمیشن نے گمراہ کن اشتہارات پر ریکٹ بینکیزر سے 15 کروڑ روپے جرمانہ وصول کر لیا
مسابقتی کمیشن نے ریکٹ بینکیزر پاکستان لمیٹڈ سے 15 کروڑ روپے کا جرمانہ وصول کرلیا ہے، جو اس کی پروڈکٹ اسٹریپ سلز کی گمراہ کن تشہیر پر عائد کیا گیا تھا۔
مسابقتی کمیشن آف پاکستان کی جانب سے جاری اعلامیے میں کہا گیا ہے کہ اپیلٹ ٹربیونل کی جانب سے کمپنی کی اپیل خارج ہونے پر کمیشن نے کمپنی کے بینک اکاؤنٹ منسلک کر کے یہ رقم ریکور کی۔
اعلامیے کے مطابق کمپیٹیشن ایکٹ کی شق 40(2)(اے) کمیشن کو اختیار دیتی ہے کہ وہ عدم تعمیل کرنے والی کمپنیوں کے بینک اکاؤنٹس منجمد کرکے جرمانے وصول کرے۔
کمپٹیشن کمیشن نے ریکٹ بینکیزر پر اس کی پراڈکٹ اسٹریپ سلز کو گلے کی سوزش کی دوا کے طور پر مارکیٹ کرنے پر جرمانہ عائد کیا تھا، حالانکہ یہ ایک نان-میڈیکیٹڈ ٹافی ہے۔
واضح رہے کئی برس پہلے اسٹریپ سلز کو بطور دوا ڈی رجسٹر کیا جا چکا ہے لیکن اس کے باوجود کمپنی نے اس پراڈکٹ کی ایسی مارکیٹنگ کی، جس سے اس کے دوا ہونے کا غلط تاثر ملتا ہے۔
کمپٹیشن کمیشن نے انکوائری کے بعد باقاعدہ سماعت کر کے کمپنی پر 15 کروڑ روپے کا جرمانہ عائد کیا تھا۔
ریکٹ بینکیزر نے کمیشن کے فیصلے کے خلاف ٹربیونل میں اپیل دائر کی تھی، جسے ٹربیونل نے عدم پیروی کی بنیاد پر خارج کر دیا۔
اپیل خارج ہونے کے بعد کمیشن نے جرمانہ جمع کروانے کی مدت پوری ہونے پر قانونی اختیارات استعمال کرتے ہوئے کمپنی کے اکاوئنٹ منسلک کر کے جرمانہ ریکور کر لیا۔
لائیو ٹی وی