ڈراما ’پرورش‘ میں نوجوانوں کے رومانس پر تنقید، ہدایتکار کا مؤقف سامنے آگیا
ڈراما پرورش میں نوجوانوں کے درمیان رومانس دکھانے پر ناظرین کی جانب سے تنقید کی جا رہی تھی، جس پر ہدایتکار میثم نقوی نے اپنا مؤقف پیش کرتے ہوئے کہا ہے کہ یہ ایک معاشرتی حقیقت ہے جسے نظرانداز نہیں کیا جا سکتا۔
مقبول ڈراما سیریل ’پرورش‘ اس وقت ناظرین کی بھرپور توجہ حاصل کر رہا ہے، ڈرامے کے ہر کردار کی اپنی الگ ایک پہچان ہے اور ہر کردار اپنی انفرادیت کی وجہ سے اس کی مقبولیت کا باعث بن رہا ہے۔
ڈرامے کی کہانی والدین کی تربیت کے مسائل اور نئی نسل کو درپیش چیلنجز پر مبنی ہے، بہت سے لوگ اس کہانی کو اپنی زندگی سے قریب محسوس کر رہے ہیں اور شائقین اس کی کہانی کے انداز کو پسند کر رہے ہیں، اگرچہ ڈرامے کو بڑی حد تک سراہا جا رہا ہے، لیکن کچھ تنقید بھی سامنے آئی ہے۔
’پرورش‘ میں ولی اور مایا کے کردار ثمر جعفری اور عینا آصف ادا کر رہے ہیں، ان دونوں کے درمیان محبت اس ڈرامے کی کہانی کا ایک مرکزی حصہ ہے۔
ناظرین میں سے کچھ کی جانب سے اس عمر کے بچوں کو اس طرح رومانی تعلق میں دکھانا درست خیال نہیں کیا جا رہا ہے۔
حال ہی میں ’پرورش‘ کے ہدایتکار میثم نقوی نے اداکار ثمر جعفری کے ہمراہ فوچیا میگزین کو انٹرویو دیا، جہاں انہوں نے نوجوانوں کے درمیان رومانس دکھانے پر وضاحت دی۔
انہوں نے بتایا کہ ڈراما دراصل نوعمری کی محبت کے بارے میں نہیں ہے، لیکن چونکہ یہ عمر ایسی ہوتی ہے جس میں نوجوان کسی نہ کسی کی جانب مائل ہوتے ہیں اور ایسا دنیا بھر میں ہوتا ہے، تو ہم نے اس حقیقت کو ٹی وی پر دکھانے کی کوشش کی ہے۔
ہدایتکار کے مطابق جب بھی نوجوان کسی کی جانب مائل ہوتے ہیں تو والدین کی جانب سے ان پر سختی کی جاتی ہے اور وہ ان پر پابندیاں لگانے کی کوشش کرتے ہیں، جس سے بچے باغی ہو جاتے ہیں۔
ان کے خیال میں والدین کو چاہیے کہ اس عمر کے بچوں سے زیادہ قریب ہوں، انھیں اپنے مشوروں میں شامل کریں، کیونکہ یہ بچے جس دور میں پیدا ہوئے ہیں، ان میں شعور بہت جلدی آ جاتا ہے، جو کہ پرانے وقتوں میں کافی سال گزرنے کے بعد آتا تھا، جب کہ جتنے جدید دور میں یہ بچے پیدا ہوئے ہیں، یہ بہت جلدی چیزوں کو سمجھ جاتے ہیں اور ان پر ایک اچھا مشورہ بھی دے سکتے ہیں۔
ہدایتکار کا مزید کہنا تھا کہ ڈرامے کا مقصد یہ دکھانا تھا کہ اس موضوع کو معاشرے میں ممنوع نہیں بنانا چاہیے، بلکہ والدین کو چاہیے کہ وہ اپنے بچوں سے ان معاملات پر بات کریں اور گھر میں ایسا ماحول پیدا کریں کہ بچے ان سے چھپ کر کبھی بھی کچھ نہ کریں۔
ان کے مطابق والدین کے اس عمل سے بچوں میں اعتماد پیدا ہوگا۔
لائیو ٹی وی