16 سال شادی کو قائم رکھنے کی کوشش کی، شوبز چھوڑا مگر رشتہ نہ چل سکا، نازلی نصر
سینئر اداکارہ نازلی نصر نے اپنی نجی زندگی کے تجربات شیئر کرتے ہوئے بتایا ہے کہ انہوں نے اپنی شادی بچانے کے لیے شوبز چھوڑا، طویل جدوجہد کی، لیکن آخرکار رشتہ برقرار نہ رہ سکا۔
نازلی نصر نے حال ہی میں ’سما ٹی وی‘ کے مارننگ شو میں شرکت کی، جہاں انہوں نے مختلف معاملات پر کھل کر گفتگو کی۔
ایک سوال کے جواب میں انہوں نے بتایا کہ محبت اور دولت دونوں زندگی کے انتہائی اہم جز ہیں، کیونکہ ان میں سے کسی ایک چیز کے بغیر بھی زندگی گزارنا بہت مشکل ہو جاتا ہے۔
اداکارہ نے کہا کہ وہ فطری طور پر بہت حساس ہیں، اسی لیے اکثر اوقات انہیں دھوکہ بھی بہت ملا ہے، وہ یہی سوچتی رہتی ہیں کہ لوگ کیا سوچیں گے اور اسی وجہ سے اکثر انہیں اپنے شوہر سے ڈانٹ بھی پڑتی ہے کہ کیوں لوگوں کے بارے میں اتنا سوچتی ہو؟ وہ کرو جو تمہارا دل چاہتا ہے۔
نازلی نصر نے اپنی پہلی شادی کے ناکام تجربے کے بارے میں بتاتے ہوئے کہا کہ انہوں نے شادی سے پہلے شوبز میں کام کرنا چھوڑ دیا تھا اور شادی کے کچھ ماہ بعد ہی انہیں اندازہ ہو گیا تھا کہ یہ رشتہ انتہائی مشکل ہے اور معلوم نہیں کہ آگے کیا ہوگا، لیکن پھر بھی انہوں نے اسی رشتے میں 16 سال گزار دیے۔
ان کا کہنا تھا کہ آج انہیں احساس ہوتا ہے کہ انہوں نے اتنے سال کیوں لگا دیے، ان کا سب لڑکیوں کو یہی مشورہ ہے کہ اگر کوئی رشتہ کامیاب نہیں ہو رہا اور دو لوگوں کی آپس میں کوئی مفاہمت نہیں تو اس رشتے کو ختم کر دینا چاہیے۔
اداکارہ کے مطابق کسی بھی رشتے میں زبردستی وقت نہیں گزارنا چاہیے، کیونکہ اس سے آپ کی زندگی ختم ہو جاتی ہے، سولہ سال ایک طویل عرصہ تھا، جس شادی کے لیے انہوں نے شوبز چھوڑا وہی شادی کامیاب نہیں ہوسکی۔
ان کا یہ بھی کہنا تھا کہ شوبز سے وابستہ لوگوں کی جب شادیاں ناکام ہوتی ہیں تو انہیں بہت تنقید کا نشانہ بنایا جاتا ہے، خاص طور پر جب وہ دوسری شادی کر لیں تو اس قسم کے تبصرے کیے جاتے ہیں کہ پہلے تو یہ اس کی بیوی تھی اور اب اس کے ساتھ ہے۔
اداکارہ نازلی نصر کی پہلی شادی اداکار حسن سومرو سے ہوئی تھی، جس سے ان کے دو بچے بھی ہیں۔ بعد ازاں اس رشتے کی ناکامی کے بعد انہوں نے ہدایت کار محسن مرزا سے دوسری شادی کر لی۔
وہ ’دھواں‘، ’میرے ہمدم میرے دوست‘، ’خواب نگر کی شاہ زادی‘، ’فراڈ‘، ’کفارہ‘ اور ’مہرا‘ جیسے مقبول ڈراموں میں اپنی اداکاری کے جوہر دکھا چکی ہیں۔
لائیو ٹی وی