’قلات آپریشن میں مارا گیا صہیب لانگو لاپتا افراد کی فہرست میں شامل نکلا‘
سیکیورٹی ذرائع کے مطابق قلات آپریشن میں مارا گیا صہیب لانگو نامی نوجوان کا نام لاپتا افراد کی فہرست میں شامل نکلا۔
ڈان نیوز کے مطابق سیکیورٹی ذرائع کا کہنا ہے کہ قلات آپریشن کے دوران مارا جانے والا صہیب لانگو بلوچ یکجہتی کمیٹی کی نام نہاد لاپتا افراد کی لسٹ میں شامل ہے۔ سیکیورٹی ذرائع نے بتایا کہ اس سے قبل بھی فتنۃ الہندوستان کے مارے جانے والے متعدد دہشت گرد نام نہاد لاپتا افراد کی لسٹ میں شامل تھے۔
سیکیورٹی ذرائع کے مطابق مارچ 2024 میں گوادر حملے میں مارا جانے والا کریم جان بھی لاپتا افراد کی فہرست میں شامل تھا، اس کے علاوہ نیول بیس حملے میں مارا جانے والا عبدالودود بھی لاپتا افراد کی لسٹ میں شامل تھا۔
سیکیورٹی ذرائع کے مطابق بی وائی سی کی ماہ رنگ بلوچ نے ہمیشہ نام نہاد لاپتا افراد کا بیانیہ اپنے مذموم عزائم اور ریاست کو بدنام کرنے کے لیے استعمال کیا، ہلاک صہیب لانگو کی ماہ رنگ بلوچ کے ساتھ مظاہروں میں کئی تصاویر اور ویڈیوز سوشل میڈیا پر موجود ہیں۔
سیکیورٹی ذرائع کے مطابق 21 جولائی 2025 کو قلات آپریشن کے نتیجے میں صہیب لانگو ہلاک ہوا، فتنہ الہندوستان نے دہشت گرد صہیب لانگو عرف عامر بخش کی ہلاکت اور خود سے وابستگی کو تسلیم کیا۔
فتنہ الہندوستان سے منسلک میڈیا پلیٹ فارم ’پانک‘ اور ’بھام‘ نے دہشت گرد صہیب لانگو کو 25 جولائی 2025 کو لاپتا قرار دیا تھا، بھام نے یہ دعویٰ کیا تھا کہ دہشت گرد صہیب لانگو کو 24 جولائی 2024 کو کلی سریاب کوئٹہ سے جبری گمشدہ کیا گیا۔
سیکورٹی ذرائع کے مطابق ماہ رنگ بلوچ اور اس کے سہولت کاروں نے نہتے اور معصوم پاکستانیوں پر فتنۃ الہندوستان کے دہشت گرد حملوں کی کبھی مذمت نہیں کی۔
لائیو ٹی وی