کراچی: کلفٹن چائنہ پورٹ سے جوڑے کی لاشیں ملنے کی تحقیقات میں پیشرفت، 4 افراد گرفتار
شہر قائد میں کلفٹن چائنہ پورٹ کے قریب سے ملنے والی لاشیں میاں بیوی کی نکلیں، پولیس نے مقتول جوڑے کا نکاح نامہ حاصل کرلیا جبکہ کراچی پولیس کی ٹیم نے گوجرانوالہ سے لڑکی کے بھائی سمیت چار افراد کو گرفتار کرلیا۔
ڈان نیوز کے مطابق کراچی مین کلفٹن چائنہ پورٹ کے قریب سے لاشیں ملنے کی تحقیقات میں پیشرفت سامنے آگئی، مقتولین میاں بیوی نکلے، دونوں نے 20 جولائی کو کورٹ میرج کی تھی۔
ساجد اور ثنا آصف کا آبائی تعلق گوجرانوالہ سے تھا، مقتولین گوجرانوالہ سے کراچی پہنچے اور مختلف علاقوں میں رہائش اختیار کی۔
ساجد مسیح نے 20 جولائی کو اسلام قبول کیا تھا، نکاح نامے کے مطابق ساجد کی عمر 28 سال اور ثنا کی عمر 25 سال تھی۔
ڈپٹی انسپکٹر جنرل (ڈی آئی جی) جنوبی اسد رضا کے مطابق میاں بیوی کو ٹارگٹ کرکے قتل کیا گیا، دونوں کو سرکے پچھلے حصے پر ایک ایک گولی ماری گئی، جائے وقوع سے ایک موبائل ملا جس میں سم موجود نہیں۔
ادھر، کراچی پولیس کی ٹیم نے گوجرانوالہ پہنچ کر لڑکی کے بھائی سمیت 4 افراد کو گرفتار کرلیا۔
مقتول ساجد کے والدین بھی کراچی پہنچ گئے، بوٹ بیسن تھانے کے باہر والدہ اور دیگر رشتہ دار غم سے نڈھال دکھائی دیے۔
واضح رہے کہ گزشتہ روز کراچی کے علاقے کلفٹن میں چائنا پورٹ کے علاقے سے لڑکے اور لڑکی کی گولیاں لگی لاشیں برآمد ہوئی تھیں، گوجرانوالہ کے ساجد مسیح اور ثنا نے پسند کی شادی کی تھی۔
لائیو ٹی وی