بھوک سے بلکتے فلسطینی بچوں کی آہوں نے عالمی ضمیر کو جھنجھوڑ دیا، شیری رحمٰن
نائب صدر پاکستان پیپلزپارٹی ( پی پی پی) سینیٹر شیری رحمٰن نے کہا ہے کہ ظلم کی انتہا کے بعد دنیا کو غزہ کا درد محسوس ہونے لگا ہے، بھوک سے بلکتے فلسطینی بچوں کی آہوں نے عالمی ضمیر کو جھنجھوڑ دیا، فرانس اور برطانیہ کا فلسطین کو تسلیم کرنے کا فیصلہ خوش آئند اور بروقت ہے، غزہ کے عوام کو صرف ہمدردی نہیں، تحفظ، خوراک، ادویات اور آزادی چاہیے۔
ڈان نیوز کے مطابق سینیٹر شیری رحمٰن نے فلسطین سے متعلق فرانس اور برطانیہ کے مؤقف پر ردعمل دیتے ہوئے کہا کہ برطانیہ اور فرانس کا یہ فیصلہ انصاف، انسانی ہمدردی اور عالمی امن کی سمت پہلا عملی قدم ہے۔
پی پی پی کی عہدیدار نے کہا کہ خوراک اور پانی کو ہتھیار بنا کر ظلم و بربریت کی انتہا کی گئی، کئی ماہ سے جاری اسرائیلی بمباری میں 60 ہزار سے زائد فلسطینی شہید ہوچکے ہیں، جن میں بڑی تعداد خواتین اور معصوم بچوں کی ہے۔
انہوں نے کہا کہ دو ریاستی حل ہی واحد راستہ ہے جو مشرقِ وسطیٰ میں دیرپا امن لاسکتا ہے، اقوام متحدہ اور عالمی طاقتوں کو اب صرف بیانات نہیں بلکہ فوری، واضح اور مؤثر اقدامات کرنا ہوں گے۔
شیری رحمٰن نے کہا کہ غزہ کے عوام کو صرف ہمدردی نہیں، تحفظ، خوراک، ادویات اور آزادی چاہیے، ہم مطالبہ کرتے ہیں کہ اسرائیل فوری طور پر جنگ بندی کرے اور غزہ میں انسانی امداد کی مکمل بحالی کی اجازت دے، پاکستان ہر دور میں فلسطینی بھائیوں کے شانہ بشانہ کھڑا رہا ہے اور ہمیشہ رہے گا۔
لائیو ٹی وی