امریکی صدر ڈونلڈ ٹرمپ نے بھارت کی معیشت کو مردہ قرار دے دیا
امریکی صدر ڈونلڈ ٹرمپ نے بھارت اور روس کو سخت تنقید کا نشانہ بناتے ہوئے دونوں ملکوں کی معیشتوں کو مردہ قرار دے دیا۔
امریکی صدر نے اپنے ’ٹروتھ سوشل‘ میڈیا پر ایک پوسٹ میں کہا کہ ’مجھے کوئی پرواہ نہیں کہ بھارت روس کے ساتھ کیا کرتا ہے، وہ اپنی مردہ معیشتوں کو ساتھ لے کر ڈوب جائیں، مجھے کوئی فرق نہیں پڑتا‘۔
انہوں نے مزید کہا کہ ’ہم نے بھارت کے ساتھ بہت کم کاروبار کیا ہے کیونکہ ان کے ٹیرف دنیا میں سب سے زیادہ ہیں، اسی طرح روس اور امریکا کے درمیان بھی تقریباً کوئی تجارت نہیں ہوتی، ایسا ہی رہنے دیں‘۔
امریکی صدر نے سابق روسی صدر دمتری میدودوف کو خبردار کرتے ہوئے کہا کہ وہ اب بھی خود کو صدر سمجھتے ہیں، انہیں بتایا جائے کہ وہ اپنی زبان پر قابو رکھیں، وہ بہت خطرناک حدود میں داخل ہو رہے ہیں۔
واضح رہے کہ امریکی صدر نے کینیڈا کی جانب سے فلسطینی ریاست کو تسلیم کرنے کے اعلان پر کینیڈا کے ساتھ تجارتی معاہدہ طے پانے کو مشکل قرار دیا تھا۔
اس سے قبل انہوں نے پاکستان کے ساتھ تجارتی معاہدے کا اعلان کرتے ہوئے کہا تھا کہ دونوں ملک مل کر پاکستان میں تیل کے وسیع ذخائر کو ترقی دیں گے، کون جانتا ہے شاید وہ ایک دن بھارت کو تیل فروخت کر رہے ہوں۔
لائیو ٹی وی