صدر مملکت آصف زرداری سے ایرانی ہم منصب کی ملاقات، دوطرفہ تعاون کے فروغ کے عزم کا اعادہ
صدر مملکت آصف علی زرداری اور اسلامی جمہوریہ ایران کے صدر ڈاکٹر مسعود پزشکیان کی ایوانِ صدر میں ملاقات ہوئی، ملاقات میں دونوں ممالک کے درمیان دو طرفہ تعاون کو مزید وسعت دینے کے عزم کا اعادہ کیا گیا۔
پاکستان ٹیلی ویژن کے مطابق صدر آصف علی زرداری نے صدر ڈاکٹر مسعود پزشکیان کا ایوانِ صدر میں پُرتپاک خیرمقدم کیا، دوران ملاقات رہنماؤں نے پاکستان اور ایران کے درمیان دو طرفہ تعاون کو مزید وسعت دینے کے عزم کا اعادہ کیا۔
دونوں صدور کی ملاقات کے دوران وسیع اور باہمی فائدے کے حامل شعبوں میں تعلقات بڑھانے کی اہمیت پر زور دیا گیا اور دونوں رہنماؤں نے علاقائی اور عالمی امور پر تفصیلی تبادلۂ خیال کیا ۔
صدرآصف علی زرداری نے کہا کہ پاکستان اور ایران کے برادرانہ تعلقات مشترکہ مذہب، ثقافت اور باہمی احترام پر مبنی ہیں، آصف علی زرداری نے علاقائی معاملات پر ایران کے اصولی مؤقف کو سراہا ۔
ملاقات میں دونوں رہنماوں کا تنازعات کو بڑھنے سے روکنے اور خطے میں امن و استحکام کے لیے مربوط سفارتی کوششوں کی ضرورت پر زور دیا۔
صدرمملکت نے خطے میں تعاون کے لیے تہران کی مستقل حمایت پر اظہار تشکر کیا اور مشکل وقتوں میں ایران کی یکجہتی پر شکریہ ادا کیا۔
صدر آصف علی زرداری نے کہا کہ پاکستان اور ایران خطے کے پُرامن اور خوشحال مستقبل کے لیے مل کر کام جاری رکھیں گے۔
صدر مملکت نے رہبرِ معظم آیت اللہ سید علی خامنہ ای کا جموں و کشمیر پر بھارتی غیر قانونی قبضے کے خلاف عوام کی مسلسل حمایت پر شکریہ ادا کیا، انہوں ایران کے خلاف اسرائیلی جارحیت کی سخت مذمت کی۔
صدر آصف علی زرداری نے 12 روزہ جنگ کے دوران ایرانی قوم کی جرات اور اتحاد کو خراجِ تحسین پیش کیا، انہوں نے امید ظاہر کی کہ صدر پزشکیان کا دورہ برادرانہ تعلقات کو مزید مستحکم کرے گا۔
صدر مسعود پزیشکیان نے 12 روزہ جنگ کے دوران پاکستان کی قیادت اور عوام کی حمایت پر شکریہ ادا کرتے ہوئے کہا کہ پاکستان نے کشیدگی میں کمی اور تنازعات کے پُرامن حل کے لیے تعمیری کردار ادا کیا-
لائیو ٹی وی