چھوٹی اور درمیانے درجے کی صنعتوں کا معیشت میں اہم مقام ہے، وزیراعظم
وزیر اعظم شہباز شریف نے کہا ہے کہ حکومت چھوٹے اور درمیانے درجے کے کاروبار کے فروغ کے حوالے سے ترجیحی بنیادوں پر کام کر رہی ہے کیونکہ ان صنعتوں کا معیشت میں اہم مقام ہے۔
ایسوسی ایٹڈ پریس آف پاکستان (اے پی پی) کے مطابق وزیراعظم شہباز شریف کی زیر صدارت سمال اینڈ میڈیم انٹرپرائز ڈویلپمنٹ اتھارٹی (سمیڈا) اسٹیئرنگ کمیٹی کا اجلاس ہوا۔
اجلاس میں وفاقی وزیر اقتصادی امور احد خان چیمہ، وفاقی وزیر موسمیاتی تبدیلی ڈاکٹر مصدق ملک، وفاقی وزیر انفارمیشن ٹیکنالوجی و ٹیلی کام شزہ فاطمہ ، وزیراعظم کے مشیر ڈاکٹر توقیر شاہ نے شرکت کی۔
وزیراعظم کے معاون خصوصی برائے صنعت و پیداوار ہارون اختر، رکن قومی اسمبلی نوشین افتخار، چاروں صوبوں، گلگت بلتستان اور آزاد جموں و کشمیر کے چیف سیکریٹریز اور متعلقہ اعلیٰ سرکاری افسران بھی اجلاس میں شریک تھے۔
اجلاس کو سمیڈا میں اصلاحات اور سمیڈا کی جانب سے اٹھائے گئے اقدامات پر بریفنگ دی گئی، جس میں بتایا گیا کہ وزیراعظم کی ہدایت پر 3 کروڑ روپے سالانہ تک کا کاروبار کرنے والی کمپنیوں کو مائیکرو انٹرپرائزز کا درجہ دے کر سمیڈا کے دائرہ کار میں شامل کر لیا گیا ہے ۔
بریفنگ میں بتایا گیا کہ ویمن انٹر پرینیورشپ پالیسی کا مسودہ تیار ہے جسے جلد وفاقی کابینہ میں منظوری کے لیے پیش کیا جائے گا جب کہ سمیڈا خواتین کے لیے خصوصی ڈیجیٹل پورٹل کا اجرا جلد کیا جا رہا ہے۔
اس کے علاوہ سمیڈا کے کریڈٹ اسکورنگ ماڈل کی تشکیل، برآمدات میں اضافے کی حکمت عملی اور ایس ایم ای کی سب کنٹریکٹنگ کے قانونی فریم ورک پر کام کو آؤٹ سورس کیا جا چکا ہے۔
بریفنگ کے مطابق سمیڈا وفاقی ادارہ شماریات کی مدد سے معیشت کے 20 شعبوں کا سروے کرا رہا ہے ۔
اس موقع پر وزیر اعظم شہباز شریف کا کہنا تھا کہ درمیانے درجے کی صنعتیں ملکی ترقی و معیشت میں اہم مقام رکھتی ہیں، حکومت چھوٹے اور درمیانے درجے کے کاروبار کے فروغ کے حوالے سے ترجیحی بنیادوں پر کام کر رہی ہے۔
لائیو ٹی وی