راولپنڈی: گردوں کے پیوندکار گروہ کا کارندہ گرفتار، اسٹریچر سے بندھا شہری بازیاب
راولپنڈی پولیس نے گردوں کی غیرقانونی پیوندکاری کرنے والے گینگ کے خلاف دوسری بڑی کارروائی کرکےگینگ کے ایک کارندے کو گرفتار کرلیا۔
ڈان نیوز کے مطابق راولپنڈی میں پولیس نے اہم کارروائی کرتے ہوئے انسانی جسم کے اعضا کی خریدو فروخت میں ملوث گروہ کے کارندے کو گرفتار کیا ہے، چھاپے کے دوران اسٹریچر سے بندھے ہوئے نوجوان حنان زاہد کو بازیاب کروالیا گیا۔
پولیس حکام کی جانب سے بتایا گیا ہے کہ راولپنڈی میں گردوں کی غیر قانونی پیوندکاری کے خلاف آپریشن کا سلسلہ جاری ہے، اس دوران پولیس کو اہم کامیابی ملی ہے۔
راولپنڈی پولیس نے چھاپہ مار کارروائی کی تو ایک شہری اسٹریچر سے بندھی ہوئی حالت میں ملا، جس کی شناخت حنان زاہد کے نام سے ہوئی، اس دوران ایک ملزم کو گرفتار بھی کیا گیا تاہم 6 ملزمان فرار ہونے میں کامیاب ہوگئے۔
یاد رہے کہ 2 اگست کو راولپنڈی پولیس نے نوکری کا جھانسہ دے کر انسانی اعضا کی غیر قانونی پیوند کاری میں ملوث 4 رکنی گینگ کوگرفتار کرکے پیوند کاری میں استعمال ہونے والے آلات برآمد کیے تھے۔
راولپنڈی کے تھانہ ایئرپورٹ پولیس نے بتایا تھا کہ ملزمان نے پاکستانی و غیر ملکی شہریوں کے لیے گردے فروخت کرنے کا انکشاف کیا تھا۔
لائیو ٹی وی