بڑھتی آبادی سے جڑے مسائل کے حل کیلئے قومی پالیسی ساز کمیٹی قائم کرنے کا فیصلہ
وزیراعظم شہباز شریف کی زیر صدارت اجلاس میں بڑھتی آبادی سے جڑے مسائل کے حل کے لیے قومی پالیسی ساز بین الوزارتی کمیٹی قائم کرنے کا فیصلہ کیا گیا ہے، وزیر اعظم نے صوبوں سے مشاورت کے ساتھ موثر حکمت عملی بنانے کی ہدایت بھی کردی۔
اجلاس سے خطاب کرتے ہوئے وزیراعظم شہباز شریف کا کہنا تھا کہ پاکستان میں آبادی کے بڑھنے کی سالانہ شرح 2.55 فیصد ہے، جس کو قومی ترقی کے تناظر میں ایک بڑا چیلنج قرار دیا گیا۔
وزیراعظم نے کہا کہ نوجوان ملک کا قیمتی اثاثہ ہیں، جنہیں قومی معیشت میں مؤثر کردار ادا کرنے کے لیے مواقع فراہم کیے جا رہے ہیں۔
وزیراعظم نے کہا کہ خواتین ہماری افرادی قوت کا بہت بڑا حصہ ہیں، ان کو ملازمت کے زیادہ سے زیادہ مواقع فراہم کرنے کے لیے اقدامات کیے جائیں، وزیراعظم نے بڑھتی ہوئی آبادی سے جڑے مسائل کے حل کے لیے قومی سطح کی جامع پالیسی تشکیل دینے کی ضرورت پر زور دیا۔
انہوں نے فوری طور پر ایک بین الوزارتی کمیٹی قائم کرنے اور صوبوں سے مشاورت کے ساتھ مؤثر حکمت عملی ترتیب دینے کی ہدایت کی۔
اجلاس میں وفاقی وزیر منصوبہ بندی و ترقی ڈاکٹر احسن اقبال، وفاقی وزیر تعلیم ڈاکٹر خالد مقبول صدیقی، وفاقی وزیر اطلاعات و نشریات عطا اللہ تارڑ، وفاقی وزیر مذہبی امور سردار محمد یوسف، وفاقی وزیر قانون اعظم نذیر تارڑ اور متعلقہ اداروں کے اعلیٰ حکام بھی شریک تھے۔
لائیو ٹی وی