راولپنڈی: سدرہ قتل کیس میں اہم پیشرفت، مقتولہ کا موبائل فون اور پرس برآمد
راولپنڈی میں جرگے کے حکم اور غیرت کے نام پر قتل کی جانےو الی 17 سالہ سدرہ کیس میں اہم پیش رفت کرتے ہوئے پولیس نے مقتولہ کا موبائل فون اور پرس برآمد کرلیا۔
ڈان نیوز نے ذرائع کے حوالے سے بتایا کہ پولیس کو مقتولہ سدرہ کا موبائل فون اور پرس مل گیا ہے، موبائل فون ملزم ضیاء الرحمن کی نشاندہی پر برآمد کیا گیا۔
ذرائع کا کہنا ہے کہ مقتولہ سدرہ کے موبائل فون کا فرانزک کرانے کا فیصلہ کیا گیا ہے جبکہ مقتولہ کے موبائل فون کی کال ڈیٹا ریکارڈ بھی حاصل کیا جائے گا۔
مقتولہ سدرہ کا موبائل فون ملزم ضیاء الرحمن کے گھر سے برآمد ہوا، کیس میں پولیس مقتولہ کے کپڑے اور آلہ قتل تکیہ بھی برآمد کر چکی ہے۔
ذرائع کا کہناہے کہ مظفر آباد جانے والی تین گاڑیاں کس کی تھیں، اس سلسلے میں بھی تفتیش جاری ہے۔
مقدمہ قتل میں مرکزی ملزم جرگے کا سربراہ عصمت اللہ سمیت 6 ملزمان جسمانی ریمانڈ پر پولیس کی تحویل میں ہیں۔
واضح رہے کہ سدرہ کے قتل کا واقعہ تھانہ پیر ودھائی کے علاقے فوجی کالونی میں پیش آیا تھا، خاتون کے پہلے شوہر ضیاالرحمٰن نے مبینہ طور پر قتل کو چھپانے کے لیے تھانہ پیرو دھائی میں مقدمہ درج کروایا تھا۔
21 جولائی کو تھانہ پیر ودھائی میں درج کرائی گئی فرسٹ انفارمیشن رپورٹ (ایف آئی آر) میں ضیا الرحمٰن نے موقف اپنایا تھا کہ اس کی شادی 17 جنوری 2025 کو سدرہ سے ہوئی تھی، مدعی نے اپنی اہلیہ پر طلائی زیورات اور نقدی لے کر فرار ہونے کا الزام عائد کیا گیا تھا۔
اطلاعات کے مطابق مقتولہ کو مبینہ طور پر جرگے کے فیصلے پر موت کے گھاٹ اتارا گیا تھا، تھانہ پر ودھائی میں درج ایف آئی آر میں لڑکی کے عثمان نامی شخص سے مبینہ تعلق اور غیر شرعی نکاح کا بھی ذکر کیا گیا ہے۔
مدعی نے ایف آئی آر میں الزام عائد کیا تھا کہ روالپنڈی کی فوجی کالونی کا رہائشی عثمان موقف اپنایا تھاکہ اس کی بیوی سدرہ کو ورغلا کر اپنے ساتھ لے گیا ہے اور غیر شرعی طور پر اس سے نکاح بھی کرلیا ہے، مدعی نے پولیس نے اپنی بیوی کو بازیات کرانے کی استدعا کی تھی۔
لائیو ٹی وی