’ارمغان کے گھر سے ملنے والا خون مصطفیٰ کی لاش سے میچ کر گیا‘، حتمی چالان عدالت میں جمع
پولیس نے مصطفیٰ عامر کے قتل کے کیس میں 2 ماہ کے وقفے کے بعد حتمی چالان (چارج شیٹ) انسداد دہشت گردی کی خصوصی عدالت (اے ٹی سی) میں جمع کروا دیا ہے۔
ڈان اخبار کی رپورٹ کے مطابق مئی میں عبوری چالان جمع کروایا گیا تھا، جس میں مرکزی ملزم ارمغان قریشی اور شیراز عرف شاہ ویز بخاری کو نامزد کیا گیا تھا۔
حتمی چالان میں تفتیشی افسر (آئی او) محمد علی نے بتایا کہ مقتول اور دونوں مشتبہ افراد کی آخری معلوم جگہ ارمغان کے گھر، ڈیفنس ہاؤسنگ اتھارٹی (ڈی ایچ اے) میں تھی۔
انہوں نے کہا کہ مقتول مصطفیٰ نے مرکزی ملزم کے گھر جانے سے قبل اپنے دوست رفیع کو فون پر اطلاع دی تھی، رفیع کا بیان ریکارڈ کیا گیا ہے۔
آئی او نے بتایا کہ ارمغان کے گھر سے جمع کیے گئے خون کے نمونے مبینہ طور پر حب کے علاقے میں کار سے برآمد کیے گئے لاش کے نمونوں سے میچ کرتے ہیں۔
رپورٹ میں دعویٰ کیا گیا کہ سی سی ٹی وی فوٹیج بھی حاصل کی گئی، جس میں کچھ افراد کو قالین سے مصطفیٰ کے خون کے دھبے صاف کرتے ہوئے دیکھا جاسکتا ہے۔
انہوں نے کہا کہ پنجاب فرانزک سائنس ایجنسی کی جانب سے زیر التوا فرانزک رپورٹس موصول ہو چکی ہیں، جن میں تصدیق کی گئی کہ سی سی ٹی وی فوٹیج میں کوئی ترمیم یا ایڈیٹنگ نہیں کی گئی، یہ اصل حالت میں ہے۔
لائیو ٹی وی