گلگت بلتستان میں بارشوں اور سیلابی ریلوں سے خاتون سمیت 3 افراد جاں بحق اور 5 لاپتا ہو گئے ہیں، اس دوران متعدد گھروں کو بھی نقصان پہنچا۔

تفصیلات کے مطابق گلگت بلتستان میں جمعرات کے روز 3 مقامات پر سیلابی ریلوں سے سڑکیں بند ہو گئیں، سیلاب کے باعث پیدا ہونے والے پینے کے صاف پانی کے شدید بحران سے سیکڑوں شہری ہیضہ ،اسہال ،ٹائیفائیڈ اور نمونیہ سمیت دیگر وبائی امراض کا شکار ہوگئے۔

ترجمان گلگت بلتستان فیض اللہ فراق کا کہنا تھا کہ غذر خلتی گاؤں میں ایک خاتون سمیت 3 فراد جان بحق ہوئے جب کہ 6 سے زائد گھر سیلابی پانی میں ڈوب گئے۔

انہوں نے مزید بتایا کہ غذد میں ہی 3 افراد لاپتا ہیں جن کی تلاش جاری ہے، دیامر علاقہ بونر داس میں بہن بھائی سیلاب میں بہہ کر لاپتا ہوئے۔

ترجمان گلگت بلتستان حکومت فیض اللہ فراق کا کہنا ہے کہ جعمرات کے روز شاہراہ بابوسر کو ایک بار پھر سیلابی ریلوں نے 2 مقامات پرنشانہ بنایا ہے۔

ترجمان کا کہنا ہے کہ شاہراہ بابوسر پر سیلاب سے لینڈ سلائیڈنگ ہوئی جس کے نتیجے میں ایک گاڑی بھی زد میں آگئی جس کے نتیجے میں ایک بچہ زخمی ہوا ہے ۔

ترجمان کے مطابق سیلابی ریلوں سے بعض مکانات کو جزوی نقصان پہنچایا ہے جب کہ سیلابی فصلیں اور زرعی زمین بھی شدید متاثر ہوئی ہیں، وزیر اعلی نے متعلقہ اداروں کو فوری سڑک بحالی کی ہدایت کی ہے۔

ترجمان گلگت بلتستان حکومت کے مطابق شاہراہ بابوسر زیرو پوائنٹ کو عارضی طور پر بند کر دی گئی ہے، جبکہ انسانی جانوں کو بچانے کے لیے ٹوریسٹ پولیس نے مسافروں اور سیاحوں کو محفوظ مقامات پر روک دیا ہے ۔

گلگت بلتستان حکومت کے ترجمان کا کہنا ہے کہ غذر تحصیل یاسین میں داپس ،حرف اور اشکائی گاؤں بھی سیلاب سے زیر آب آ ئے ہیں اور یاسین تھوئی گاؤں کے ڈی جے اسکول ،ڈسپنسری اور رابطہ سڑکوں کو بھی نقصان پہنچا ہے ، اور اسی مقام پر پانی ذخیرہ کرنے والا ٹینک بھی تباہ ہو گیا ہے۔

ترجمان کے مطابق دیوسائی علی ملک ٹاپ پر لینڈ سلائیڈنگ سے رابطہ سڑک بند ہو گئی ہے اسی طرح سدپارہ روڑ بھی بند ہو گئی ہے، تھور نالے میں سیلاب آیا ہے۔

غذر سے ممتاز سیاسی شخصیت ظفر شادم خیل کے مطابق برگل میں سیلاب سے بڑے پیمانے پر عوامی املاک کو نقصان پہنچا ہے، اسی طرح چٹو کھنڈ اور قریبی نالے میں بھی سیلاب آنے سے دریا میں خوفناک طغیانی آ ئی ہے ۔

سیلابی صورتحال سے دریائے گلگت میں اونچے درجے کا پانی آنے سے نشیبی علاقوں میں گھر اور کھیت کھلیان شدید کٹاؤ کی زد میں آئے ہیں۔

صاف پانی کی قلت سے سیکڑوں شہری پیٹ کے امراض میں مبتلا

دوسری جانب، گلگت بلتستان میں سیلاب کے باعث پیدا ہونے والے پینے کے صاف پانی کے شدید بحران سے سیکڑوں شہری ہیضہ ،اسہال ،ٹائیفائڈ اور نمونیہ سمیت دیگر وبائی امراض کے شکار ہو گئے ہیں۔

گلگت بلتستان محکمہ صحت کے سیکرٹری آصف اللہ کے مطابق ماہ اگست میں مجموعی طور پر 3321 کے شدید اسہال کے کیسز سامنے آئیں جن میں اسکردو میں 622 ، دیامر 440 ، استور 440، گانچھے 428 گلگت 258 ،کھرمنگ 296 ،شگر 346 اور سکردو میں 627 کیسز رجسٹرڈ ہوئے۔

اسی طرح پانچ سال سے کم بچوں میں 565 نمونیہ کیسز سامنے آئے جن میں سے دیامر 198 کے ساتھ سر فہرست جبکہ غذر 181، گلگت 82 اور اسکردو میں 80 بچے اس بیماری کے شکار ہوئے ۔

محکمہ صحت کی رپورٹ کے مطابق ٹائیفائیڈ بخار کے مجموعی طور پر 272 کیسز رپورٹ ہوئے جن میں استور 140 اور دیامر 80 کے ساتھ دیگر اضلاع میں سر فہرست رہے۔

رپورٹ کے مطابق مشتبہ ہیضہ کے کل 56 شکایات درج ہوئی رپورٹ میں بتایا گیا ہے کہ علاقہ بھر میں ہیپٹائٹس کے 18 کیسز میں استور 8، نگر 7 اور ضلع ہنزہ میں تین کیسز سامنے آئے۔