حادثے کی وجہ سے کوما میں چلی گئی تھی، نمرہ خان نے اپنی زندگی کا سب سے تاریک باب شیئر کردیا
اداکارہ نمرہ خان نے 2015 میں پیش آنے والے خوفناک حادثے کی یادیں تازہ کرتے ہوئے اپنی زندگی کا سب سے تاریک باب بیان کردیا۔
نمرہ خان نے انسٹاگرام پر اپنی شدید زخمی حالت کی تصاویر شیئر کیں، جن میں وہ کار حادثے کے بعد ہسپتال میں زیرِ علاج اور کچھ میں وہیل چیئر پر بیٹھی ہوئی نظر آ رہی ہیں۔
انہوں نے لکھا کہ آج سے دس سال پہلے انہوں نے اپنی زندگی کا سب سے تاریک باب دیکھا، ایک ایسا حادثہ جس نے انہیں ہر سانس کے لیے لڑنے پر مجبور کر دیا۔
انہوں نے لکھا کہ اس حادثے کی وجہ سے وہ کوما میں چلی گئیں تھیں اور زندہ رہنے کے لیے انہیں دوسروں پر انحصار کرنا پڑا۔
نمرہ خان کے مطابق جس دن وہ صحت یاب ہوئیں، وہ ان کی دوسری زندگی کی شروعات تھی، وہ دن ان کا یومِ آزادی بن گیا اور اس نے انہیں دوبارہ زندگی گزارنے، محبت کرنے اور مضبوط ہو کر اٹھنے کا موقع دیا۔
اداکارہ نے انسٹاگرام اسٹوری میں ایک ویڈیو بھی شیئر کی، جس میں ایک لڑکی کو دوبارہ سے چلنے پھرنے کے لیے محنت کرتے ہوئے دیکھا جا سکتا ہے۔
اس اسٹوری کو شیئر کرتے ہوئے انہوں نے لکھا کہ ماضی میں انہوں نے بھی اسی قسم کی تکلیف کا سامنا کیا تھا، اس وقت انہوں نے اس بارے میں کسی کو نہیں بتایا تھا لیکن اس ویڈیو کو دیکھ کر سب کو اندازہ ہو سکتا ہے کہ یہ کتنا مشکل تھا۔
لائیو ٹی وی